Кніжна-выставачная прастора «Кніжная Шафа» прадстаўляе выставу PF-здымкаў (+18) з калекцый Міхаіла Гаруса, Наталлі Яўмененка, Маргарыты Трэнінай і Аляксея Ільіна, якая пройдзе з 29 снежня 2015г. па 23 студзеня 2016 г. ў Мінску.
Сучасная PF-фотакартка — гэта невялікая картка, якая памерам звычайна не перавышае стандартную паштоўку. Абавязковымі атрыбутамі з’яўляюцца сімвалы “PF”, атрыманыя з першых літар французскай мовы «Pour Féliciter» (“каб павіншаваць”) альбо італьянскай «Po Félicita» (“на шчасце”), лічбы надыходзячага каляндарнага года і, вядома, аўтарскі подпіс, а часам нават і адрас.
Наведвальнікі выставы ўбачаць PF-фатаграфіі мінскіх фатографаў, якія ахопліваюць перыяд з 1985 па 2015 гады. Гэта і серыі, выкананыя ў адзіным стылі, а таксама надрукаваныя ўручную або створаныя з ужываннем сучаснай лічбавай тэхнікі; працы, якія дэманструюць розныя спосабы афарбоўкі: ад таніравання волавам і салямі тыамачавіны да выкарыстання звычайных каляровых алоўкаў.
PF — своеасаблівая візітная картка фатографа, маленькая справаздача перад сабой і калегамі, нефармальнае падвядзенне вынікаў года. Часам — сур’ёзныя, часам — падобныя на жарт, часта — філасофскія або авангардысцкія, але заўсёды самабытныя, гэтак жа, як і іх аўтары.
Сярод фатографаў ёсць добрая традыцыя — перад Новым годам сустракацца і абменьвацца фотавіншаваннямі — PF-камі.
Напярэдадні навагодніх святаў запрашаем ўсіх далучыцца да традыцыі фотовіншаванняў!
Адкрыццё адбудзецца 29 снежня ў 19.00, уваход вольны.
Чакаем вас па адрасе: праспект Дзяржынскага, 9, «Кніжная Шафа» (уваход са двара).
Тэлефон: +375 17234 48 64, [email protected].
Кантактная асоба: Анастасія Дудкова, +375 29637 09 53.
Час працы выставы: пн.-пт .: 10.00 – 20.00, cуб.: 11.00 – 18.00, нд .: – выхадны.
