24 сакавіка ў галерэі «Панарама» на самым версе Нацыянальнай бібліятэкі пачала працу выстава акварэлі Марыі Сыракваш «Вандроўкі ў мінулае».
Дата: з 24 сакавіка па 29 мая
Месца: галерэя «Панарама» (22 паверх), Нацыянальная бібліятэка Беларусі, пр-т Незалежнасці, 116, Мінск
Выстава — вынік шматлікіх вандровак «нон-стоп» па Беларусі і ў гістарычную мінуўшчыну роднай зямлі, наведвання знакавых мясцiн i малавядомых куткоў.
У многiх мясцiнах мастачка бывала па некалькi разоў i на ўласныя вочы бачыла, як час іх знішчае. Так нарадзiлася iдэя адлюстраваць у выглядзе серыі акварэльных малюнкаў бясконцы карагод вобразаў знiкаючай Беларусi, паказаць іх чароўную прыгажосць i скамянелую гiсторыю.
Серыя складаецца з некалькiх дзясяткаў прац, створаных у 2019–2021 гг. На малюнках — Крэўскі і Смалянскі замкі, царква і касцёл у Ракаве, сядзібы Рэйтанаў, Дамейкаў, Храптовічаў і інш.
