Гэта будзе канцэрт з двух умоўных аддзяленняў: традыцыйнай праграмы, складзенай па замовах, і новай — зробленай па матывах ірландскіх народных песень.
Народныя песні — гэта тое, да чаго вяртаешся з любога падарожжа па музычных жанрах.
Але чаму ў дадзеным выпадку ірландскія?
Ірландыя — гэта доўгая гісторыя невялікага народа са складаным лёсам, свята якога, Дзень Святога Патрыка, з захапленнем адзначае ўвесь свет.
Многія ўражваюцца баладамі, якія вельмі цяжка не слухаць.
Хочацца далучыцца.
Не проста паўтарыць за кімсьці нешта, хаця б і тое, ад чаго ў захапленні, а далучыцца.
Зрабіць унёсак, які патрэбны ў першую чаргу сабе самому, бо дапаможа падзяліцца з наваколлем знойдзенымі сэнсамі.
Тымі сэнсамі, якія слабо перадаць сучаснай дваістай камп’ютарнай мовай.
Сэнсамі, закладзенымі ў глыбіні простых словаў.
Адвечнымі сэнсамі, якія наноў шукае кожнае пакаленне.
Замест таго каб узяць даўно знойдзеныя.
Хаця б з ірландскіх баладаў.
Да таго ж атрымаўшы пэўную асалоду ад іх прыгажосці.
Дзейныя асобы:
Алесь Камоцкі – голас, гітара
Алег Змушка – голас, гітара
Анатоль Лабанок – голас, кантрабас
Алеся Сівохіна – голас, гітара
+Dzivasil:
Андрэй Малаковіч – гітара, перкусія
Іна Перасецкая-Малаковіч – голас, разнастайныя музычныя інструменты
Замовіць квіткі можна па тэлефонах:
+375 29 253 25 04 МТС
+375 29 355 43 84 Velcom
Алесь Камоцкі – сталы і мудры рамантык, аўтар і выканаўца песень, якія падпадаюць пад вызначэнне “папулярная музыка для дарослых”. Носьбіт сваіх уласных, важных для сучаснага слухача беларускіх традыцый, які мяккім і пранікнёным голасам спявае нетаропкія, душэўныя, чыстыя гісторыі. Настрой асаблівай утульнасці, сапраўднай паэзіі – сучаснай, але вельмі блізкай і зразумелай, з тонкім пачуццём гумару і вельмі роднай для любога беларускага слухача – чакае вас на канцэртах Алеся Камоцкага.
Dzivasil — гэта сюррэалістычныя пейзажы з гукаў, даступныя толькі зроку інтуітыўнаму. Dzivasil – гэта не аўтэнтычнае выкананне і не лубок з жыцця беларускага народа, а наследаванне тым, невядомым, чые імёны не захаваліся, але створаная імі сутнасць трымае жыццё. Гэта ўспаміны ўспамінаў, калі музыка канцэнтруецца ў некранутых актуальнай рэчаіснасцю кутках памяці, што захавалі векапомныя спадчынныя вобразы, якія выканаўцы яднаюць з сучаснымі і футурыстычнымі сродкамі музычнай мовы.
