Анлайн-прэзентацыя кнігі «Іншая гісторыя савецкага беларускага кіно»
03.02.2025
18:00 - 20:00
------------
Бясплатнае
У панядзелак, 3 лютага, у межах Беларускага Калёквіўму адбудзецца анлайн-прэзентацыя кнігі Вольгі Раманавай «Іншая гісторыя савецкага беларускага кіно».
Ладзіць яго кафедра публічнай гісторыі Фернаўскага ўніверсітэта ў Хагене ў супрацоўніцтве з Беларускім інстытутам публічнай гісторыі, Цэнтрам беларускіх і рэгіянальных даследаванняў Еўрапейскага гуманітарнага ўніверсітэта, Інстытутам гістарычных даследаванняў Цэнтральна-Усходняй Еўропы імя Гердэра і Брэменскім універсітэтам.
Калёквіўм мае на мэце стварыць платформу для навукоўцаў, якія засяроджваюцца на Беларусі, каб дзяліцца і абмяркоўваць свае даследаванні.
Кніга «Іншая гісторыя савецкага беларускага кіно» напісана як цыкл навуковых эсэ. Кожнае даследаванне нарадзілася з пытанняў, пастаўленых у сучаснасці.
Пра якія сацыяльныя, культурныя, палітычныя працэсы сёння могуць расказаць фільмы Белдзяржкіно перыяду НЭПа і беларусізацыі?
Ці можна лічыць савецкае беларускае кіно каланіяльным і якія сэнсы адкрывае і перакрывае гэтая пэрспэктыва?
Сляды якіх палітычных тэндэнцый захоўвае ў сабе вобраз «савецкага беларуса», як ён ствараўся, у якіх формах існаваў пасля вайны і смерці Сталіна?
«Іншая гісторыя» беларускага кіно паўстае на старонках кнігі шляхам пераносу даследчага цэнтру з агульнасавецкай гісторыі кінематографа на айчынную, пошуку яго спецыфікі, яго непаўторных тэндэнцый, апісання ўзаемаадносін беларускіх і маскоўскіх структур кіраванне кінематаграфіяй.
Усе фільмы разглядаюцца ў кантэксце грамадска-палітычных і культурных працэсаў, якія адбываліся ў БССР у розныя перыяды.
Мадэратарка — доктарка Вольга Брухавецкая.
