Анлайн-вечарына: «Партрэт з памяці»: Віслава Шымборска ў вершах і беларускіх перакладах
Пачатак: 01.02 (18:00)Канец: 01.02 (20:00)
1 лютага а 18:00BY/16:00PL у межах праекту «Санаторый пад клепсідрай» на старонцы «Прастора польскай культуры» запрашаем на размову і чытанні, прысвечаныя геніяльнай польскай паэтцы Віславе Шымборскай (1923-2012). Час падзеі невыпадковы, бо 1 лютага — дзень памяці нобелеўскай лаўрэаткі, а юбілейны 2023-ці абвешчаны ў Польшчы Годам Шымборскай.
Дата: 1 лютага
Час: 18.00 (па Мінску), 16.00 (па Варшаве)
Месца: анлайн
Што зрабіла Віславу Шымборску «Першай Дамай польскай паэзіі» і адной з найлепшых паэтак ХХ стагоддзя?
Чаму толькі трэцюю кнігу вершаў аўтарка палічыла сваім сапраўдным паэтычным дэбютам?
Як у свеце яе лірыкі суіснуюць высокае і нізкае, вечнае і штодзённае, асабістае і ўніверсальнае?
Як памяць служыць інструментам самапазнання і пераасэнсавання свету? Чым вінаваты Ісак і чаму павярнулася Лотава жонка?
Якое месца займаюць сны і «размовы з мёртвымі»?
Чаму служыць і куды вядзе свет прадметаў і рэчаў?
Як «зазямляецца» пафас маральнай праблематыкі?
Якую ролю выконваюць (сама)іронія і гумар?
Як вершы Віславы Шымборскай перакладалася на беларускую мову? (Ад Максіма Танка і Ніны Мацяш да сучасных паэтаў-перакладчыкаў).
Над гэтымі ды іншымі пытаннямі мадэратар сустрэчы Андрэй Хадановіч паразважае разам з перакладчыцай і літаратуразнаўцай Марынай Казлоўскай. Вы таксама пачуеце голас паэткі, яе вершы ў арыгінале і ў беларускіх перакладах.
