У чацвер, 21 лістапада, у Музеі Вольнай Беларусі адкрываецца выстава польскай мастачкі Веранікі Вжосэк «Рэтраўматызацыя».
Дата: 21 лістапада
Час: 19.00 (час мясцовы)
Месца: Музей Вольнай Беларусі, Foksal 11, Варшава
Выстава складаецца з міждысцыплінарных прац: графіка, інсталяцыя, скульптура, тэкстыль і жывапіс.
Яна падзеленая на дзве часткі: першая — пра агульную гісторыю, другая — пра беларускую сучаснасць, асабліва пасля 2020 года.
Мастачка звяртаецца да матываў барочных інсталяцыяў, вядомых як «castrum doloris», сармацкага труннага партрэту або ўпрыгожванняў паўстання 1863 года.
А з іншага боку, яе натхняюць працы Збылюта Гжывача, Ежы Зеліньскага і Пабла Пікаса.
«Мы, палякі, жывём з велізарным гістарычным адчуваннем нешанцавання, бо цэнтр Еўропы з геапалітычных прычынаў ніколі не быў месцам жыцця мары.
У 2020 годзе, калі польскія медыі бесперапынна паведамлялі пра падзеі пасля выбараў у Беларусі, я пачала больш цікавіцца гісторыяй гэтай краіны і зразумела, што ў Беларусі столькі ж прычын для траўмаў, колькі і ў Польшчы, і нават больш, бо свет лёгка забывае пра яе.
І самае галоўнае, у гэтай частцы свету гісторыя занадта часта паўтараецца. Адсюль і „рэтраўматызацыя“ — траўмы, перажываныя зноў і зноў», — кажа мастачка.
Выстава працуе па 8 снежня.
Уваход вольны.
