Выстава Юры Шуста «Жывіца* Сонечнае спляценне» ў Варшаве

У чацвер, 16 ліпеня, у Варшаве адкрываецца выстава Юры Шуста «Жывіца* Сонечнае спляценне». 

Выстава распавядае пра ўзаемасувязь паміж чалавечай духоўнасцю і тэхналогіямі. 

Для выставы мастак стварыў новую шматканальную інсталяцыю, якая складаецца з фільмаў, гуку, перформансаў і аб’ектаў з арганічных і прамысловых матэрыялаў, размешчаных у пяці залах галерэі «Захэнта». 

Яна знаёміць гледача з ландшафтам, які распасціраецца паміж плантацыяй калядных ёлак, могілкамі, дзе дрэвы растуць з магіл, і старажытным усходнееўрапейскім лесам. 

Гэта месцы, дзе старажытныя ўяўленні пра адносіны чалавека з прыродай сустракаюцца з сучаснымі тэхналогіямі — ад прамысловай эксплуатацыі навакольнага асяроддзя да штучнага інтэлекту і лічбавых камунікацыйных сетак. 

У гэтым ландшафце елкі калісьці лічыліся сувязным звяном паміж матэрыяльным і духоўным светамі, а лес функцыянаваў як свяшчэнная прастора. 

Сёння гэтыя ж тэрыторыі становяцца месцам геапалітычнай напружанасці, інфраструктуры назірання і інтэнсіўнага выкарыстання перадавых тэхналогій. 

Мастак даследуе, як гэтыя элементы бяруць на сябе функцыі, якія раней прыпісваліся рытуалам, міфалогіям і духоўным практыкам, і як яны змяняюць нашы спосабы зносін з навакольным асяроддзем і разумення рэальнасці. 

На адкрыцці вас чакае групавы перформанс «Птушкі з чалавечымі галовамі». 

Юра Шуст — беларускі мастак (нар. 1983 г.), які жыве ў Берліне і спалучае палітычна ангажаванае мастацтва са стварэннем спекулятыўных бачанняў будучыні. Ён цікавіцца сувязямі паміж духоўнасцю, тэхналогіямі і біяпалітыкай, а таксама магчымасцямі супраціву сістэмам улады. 


Працуе выстава да 27 верасня.