24 студзеня ў межах праекту «Жывы Тузін» ў клубе Loft адбудзецца супольны канцэрт двух адметных беларускіх гуртоў. BosaeSonca прэзентуе свой новы «Залаты альбом», а музыкі з ili-ili упершыню пакажуць сваю новую беларускамоўную праграму «list», якую яны падрыхтавалі адмыслова для гэтага вечара.
«Залаты альбом» – першы студыйны CD гурта BosaeSonca. Мала сказаць, што ён чаканы. Ад часу заснавання ў 2006 годзе музыкаў пастаянна пыталі, калі ўжо яны выдадуць поўнафарматны дыск. «Доўгі час мы знаходзіліся ў пошуках нашага гучаньня, і як толькі зразумелі, як павінны выглядаць нашы песьні адразу ж пайшлі ў студыю» – тлумачыць лідэр гурта Алесь Кот-Зайцаў. Сваё сучаснае гучаньне гурт прадэманстраваў у самотніку «Золатам», які нядаўна быў прэзентаваны на Tuzin.fm і выклікаў станоўчую рэакцыю ў слухачоў. Пад уплывам ад гэтага ўдалага трэку і вырашана было даць назву ўсяму дыску – «Залаты». «Гэта не таму, што мы імкнемся да глабальнай папулярнасці. Тут хутчэй маецца на ўвазе глыбіня, рамантычнасць і цвёрдасць», – кажа Алесь.
Падтрымае калегаў гурт ili–ili, які адмыслова да гэтага вечара падрыхтаваў цалкам беларускамоўную праграму, якая завецца «list». «Калі з’явілася ідэя нашага супольнага канцэрту з гуртом BosaeSonca, то мы адразу вырашылі згадаць напрацоўкі нашых песень, напісаных па-беларуску і дарабіць іх», – кажа Міхась Зуй. Нядаўна ён ды іншы ўдзельнік гурта Зьміцер Ясеневіч ездзілі ў складзе трупы Купалаўскага тэатру ў гастролі па Францыі, якія цягнуліся 37 дзён. «Як не дзіўна, але менавіта там, на чужыне, беларускамоўныя песні ў нас пісаліся адна за адной, так што ўтварылася паўнавартасная праграма, якую мы і збіраемся прадставіць наведнікам “Жывога Тузіну”», – распавядаюць музыкі.
Весьці канцэрт па традыцыі будзе Алег Хаменка, музыкант і нязьменны вядучы радыёвэрсіі гіт-параду «Тузін Гітоў». Не абыйдзецца справа без падарункаў ад сяброў «Тузіна Гітоў» — кампаніі «Будзьма беларусамі!».
24 студзеня (чацвер). 19.00. Loftcafе (вул.П.Броўкі, 22).
Гурт BosaeSonca з прэзентацыяй «Залатога альбому».
Гурт ili-ili з прэм’ерай праграмы «list».
Кошт квітка – 85 000 руб., адзін квіток на дваіх – 150 000 руб.
