31 студзеня адбудзецца другая сустрэча з серыі бясплатных экскурсій “Я быў тут” па горадзе Брэсце.
Гэтым разам можна будзе паслухаць беларускамоўны аповед пра культурнае развіццё нашых мясцін ў “Музеі гісторыі горада Брэста”. Да ўдзелу запрашаюць усіх жадаючых. Месца збору для першай культурнай прагулкі ў нядзелю ў 15:00 каля ўвахода ў Музей (вул. Леванеўскага 3).
Яшчэ запланавана 4 экскурсіі, якія пройдуць па розных маршрутах і з рознымі экскурсаводамі — спецыялістамі ў сваёй галіне, якія захопяць удзельнікаў цікаўнымі гісторыямі.
Мерапрыемствы ладзяцца у межах кампаніі “Наша мова”, яны закліканы распавесці шырокай публіцы пра гісторыю развіцця беларускай мовы і літаратуры на Берасцейшчыне, аб малавядомых славутасцях і цікавых фактах з гісторыі горада.
Экскурсіі спадабаюцца ўсім, хто хоча больш даведацца пра багатую гісторыю аднаго з найстарэйшых гарадоў Беларусі, пазнаёміцца з яго культурным жыццём (былым і сучасным), убачыць культавыя будынкі і даведацца пра таленавітых людзей, якія жылі і тварылі ў гэтых месцах.
Цікава будзе і берасцейцам, і гасцям Брэста!
Калі: 31 студзеня (нядзеля) у 15:00.
Дзе: г. Брэст, вул. Леванеўскага 3.
Удзел бясплатны!
Даведка:
Кампанія “Наша мова” стартавала ў Берасці ў 2014 годзе. Яна прыцягнула вялікую колькасць удзельнікаў у свае крэатыўныя праекты: стварэнне паштоўкі “Кахай па-беларуску”, “Берасцейскі вершнік”, конкурс “Фотамаўленне”, Акцыя “Мова дзеткам” і іншыя. У 2015 годзе кампанія працягвае праводзіць цікавыя конкурсы і мерапрыемствы і тым самым прыцягваць берасцейскую моладзь да актыўнага жыцця.
