Чатырнадцаты «Марафон «Налібокі»
28.05.2022 - 29.05.2022
11:00 - 18:00
Налібоцкая пушча
ад 40 рублёў
28 і 29 траўня адбудзецца #марафонНалібокі. Сёлета — выключна як спартыўнае мерапрыемства, без святочнай часткі.
Дата: 28–29 траўня
Месца: Налібоцкая пушча
У сітуацыі вайны ва Украіне арганізатары лічаць немагчымым правесці яркі, вясёлы, «нармальны» спартыўны фестываль. Але перакананыя, што кожнаму патрэбна падтрымка, добрыя таварышы побач і невялікі адпачынак у чароўнай Налібоцкай пушчы.
ШТО БУДЗЕ:
11 дыстанцый: для бегуноў, веласіпедыстаў, воднікаў, мультыспартсменаў;
старт адкрыты на працягу некалькіх гадзін — па меры падрыхтаванасці і па выбары ўдзельнікаў;
дыяпазон часу, калі можна стартаваць, залежыць ад вашай дыстанцыі;
электронная адзнака і пратакол вынікаў у агульным заліку і ўзроставых катэгорыях;
маркіроўка маршрутаў (усіх акрамя воднага);
пункты харчавання на дыстанцыі;
фатографы на дыстанцыях;
памятны медаль удзельніка на фінішы;
гарбатка і перакус на фінішы;
кемпінгавая паляна, паркоўка, дровы, туалеты;
арганізаваны трансфер з Мінска і назад;
дыпломы, кубкі і прызы пераможцам адправяцца поштай;
зносіны, начныя вогнішчы і шмат аднадумцаў вакол.
ЧАГО НЕ БУДЗЕ:
мас-старту апоўдні суботы;
гарачага абеду на фінішы;
урачыстага ўзнагароджання і пераможнага шампанскага;
вячэрняй забаўляльнай праграмы.
Гэты старт арганізаваны, каб яго ўдзельнікі:
адправіліся ў падарожжа па Налібоцкай пушчы,
спаборнічалі за лепшы вынік з сабой і сапернікамі,
любаваліся прыгажосцямі вясновай прыроды,
адпачывалі ў кемпінгу ля вогнішча са сваімі сябрамі.
Цэнтр спаборніцтваў, старт — фініш і кемпінг — турыстычная стаянка «Сутокі» каля в. Рудня, Валожынскага раёна. Каардынаты: 53.96409, 26.70070.
Да сустрэчы на ўскрайку Налібоцкай пушчы ў апошнія вясновыя выходныя!
