28 красавіка, у нядзелю, Філіял «Літаратурны музей Максіма Багдановіча» запрашае на экскурсію.
Дата: 28 красавіка
Час: 12.00 (час мясцовы)
Унёсак: 20 руб.
Месца: г. Мінск, вул. М.Багдановіча, 7а.
На экскурсіі вы бліжэй пазнаёміцеся з асобай маладога таленавітага класіка, які ў свой час разбурыў шаблон успрымання беларускага пісьменніка як прадстаўніка вёскі. Даведаецеся, як паэту, амаль усё жыццё пражыўшы ўдалечыні ад Бацькаўшчыны, удалося вывесці на еўрапейскі ўзровень беларускае вершаскладанне.
У музеі можна пабачыць унікальныя фотаздымкі і рукапісы Максіма Багдановіча, прадметы, звязаныя з яго сям’ёй і сябрамі, а таксама рэчы, якія сталі сімваламі беларускай культуры — залататканы слуцкі пояс і арыгінальную кнігу «Вянок».
Экскурсія з’яўляецца дабрачыннай — заробленыя грошы будуць залічаны на рахунак, дзе акумулююцца сродкі на стварэнне надмагільнага манумента пісьменніку і актыўнаму дзеячу літаратурна-грамадскага руху ў Мінску пачатку XX ст. Змітраку Бядулю.
Класікаў звязвала не толькі літаратурна-грамадская дзейнасць, але і моцнае, шчырае сяброўства. Падчас прыезду Багдановіча ў Мінск у кастрычніку 1916 года менавіта Змітрок Бядуля даў хвораму паэту прытулак, выдзеліўшы яму на сціплых арэндаваных метрах асобны пакой. Пад агульным дахам яны разам пражылі да самага ад’езду Багдановіча ў Ялту...
Экскурсію правядзе загадчык музея Міхаіл Бараноўскі.
Усіх удзельнікаў чакаюць памятныя сувеніры ад музея!
Запіс па тэл.: +375 (17) 363 94 65.
