10 студзеня 2019 года а 17-й гадзіне ў мастацкай галерэі “Універсітэт культуры” (Палац Рэспублікі) адбудзецца вернісаж выставы Беларускага саюза фатографаў “#дом207595”.
207 595 км2 – плошча тэрыторыі Рэспублікі Беларусь. За гэтымі лічбамі – шум вялікіх гарадоў і цішыня маленькіх вёсак, людзі, што там жывуць, іх побыт, дарогі, якімі яны ходзяць. Агульным словам, гэта жыццё, якое і стала галоўнай тэмай выставы з своеасаблівай назвай “#дом207595”.
Мэта выставы – спроба паказаць, як развіваецца сёння сучасная нацыянальная фатаграфія. Куратар выставы, фатограф Марына Бацюкова, адзначыла, што культурнае жыццё краіны не сканцэнтравана толькі ў Мінску. У іншых гарадах Беларусі працуе шмат таленавітых, удумлівых аўтараў, працы якіх трэба паказваць шырокай аўдыторыі.
Удзел у выставе прымаюць 14 аўтараў з Гродна, Гомеля, Мазыра, Магілёва, Асіповічаў, Салігорску. У невялікіх серыях ці асобных працах яны засяроджваюць увагу гледачоў на цікавых момантах жыцця, на тварах і постацях людзей, іх занятках, перадаюць атмасферу сваёй мясцовасці.
Выстава “#дом207595” мае тэматычныя напрамкі: Прастора, Людзі і Канцэпт, якія экспазіцыйна не выдзяляюцца ў асобныя часткі. Тое самае тычыцца і розных тэхнік выканання. Побач змяшчаецца аналагавая, лічбавая фатаграфія, працы, выкананыя ў тэхніке ручнога ці гуміалейнага друку.
Самая вялікая па колькасці прапанаваных работ экспазіцыя з Магілёва, яна размесціцца ў асобнай зале. Падчас адкрыцця выставы гледачы будуць мець магчымасць пазнаёміцца з грунтоўнай кнігай “Магілёўскі фотаальбом. 1864–2000”. Гэта фундаментальнае выданне, у якім разам з гістарычным экскурсам у мінулае фатаграфіі ўтрымліваецца партфоліа магілёўскіх аўтараў, пачынаючы з 1864 года. Укладальнікі кнігі – фатографы Аляксандр Ліцін і Ірына Савосіна.
Выстава адкрыта для наведвальнікаў з 9 па 21 студзеня 2019 г.
Куратар выставы: Марына Батюкова (+375296547736).
Адрас галерэі: Кастрычніцкая плошча, 1 (Палац Рэспублікі),
тэл./факс: 327 26 12, +375 29 350 40 45
(дырэктар Марына Аляксандраўна Татарэвіч).
Галерэя працуе: аўторак–субота 11:00–19:00, уваход вольны.