У суботу, 24 лютага, у музеі народнай архітэктуры і побыту ў Азярцы ладзяць Дзень Батлейкі і прысвячаюць імпрэзу Дню роднай мовы.
Дата: 24 лютага
Час: з 14:00 да 16:00
Месца: музей народнай архітэктуры і побыту, Азярцо, Мінскі раён
Вы ўбачыце рэканструкцыю прадстаўленняў 1920-1930-х гг. ад мірскіх батлеечнікаў — сям’і Сілко: батлеечную дзею «Калядна» (мясцовую інтэрпрэтацыю спектакля «Цар Ірад») і спектакль «Салдат і чорт».
Яны характэрны толькі для Мірскай батлейкі, унесенай у спіс гісторыка-культурных каштоўнасцей Беларусі.
Будзе таксама калядная батлейка «Віцебскі жлоб», якая атрымала статус элемента нематэрыяльнай культурнай спадчыны Віцебскай вобласці.
Гэтая батлейка страціла жывое бытаванне яшчэ ў мінулым стагоддзі і засталася існаваць толькі ў літаратурных крыніцах. Пры аднаўленні выкарыстоўваліся запісы этнографаў XIX-XX стст.
Батлейка «Віцебскі жлоб» сваёй пабудовай значна адрозніваецца ад звычайнага тыпу беларускай батлейкі тым, што спалучае статычную частку і рухомую.
Сам тэатр мае выгляд трохкупальнай царквы, якая стаіць на адпаведнай лаве і мае адну нішу, дзе знаходзяцца нерухомыя лялькі і тры нішы з рухомымі кружэлкамі, у якіх рухаюцца ценявыя фігуры.
Дзеянне суправаджаецца песнямі і кантамі на тэму Наражэння Хрыстова.
Уся дзея адбываецца ў цемры, і фігуркі, якія круцяцца ў нішах пры святле свечак, ствараюць магічны чароўны свет.
Вас чакае:
батлейка ад Мірскага дзяржаўнага каледжа;
народны тэатр лялек «КапялюШ»;
выступленні творчых калектываў.
Кошт квіткоў:
для дарослых — 14 рублёў; студэнтаў ды школьнікаў — 7 рублёў; для дашкольнікаў — бясплатна.
