Дзяржынск. Выстава “У пакоі старасвецкія зазірнуўшы”
Пачатак: 02.10 (09:00)Канец: 02.10 (17:00)
Дзяржынскі раённы гісторыка-краязнаўчы музей
2 кастрычніка выстава “У пакоі старасвецкія зазірнуўшы” адкрыецца ў Дзяржынскім раённым гісторыка-краязнаўчым музеі.
Некалі сядзібныя дамы былі сапраўдным упрыгажэннем беларускай зямлі. Яны з’яўляліся сапраўдным асяродкамі культуры – сядзібная спадчына стала асновай для развіцця многіх відаў беларускага мастацтва: музыкі, жывапісу і інш.
Сядзіба ў яе выпрацаванай стагоддзямі форме знікла, але яшчэ доўга будзе важным элементам нацыянальнага самапазнання. Існуе дастаткова матэрыялаў, з якіх можна атрымаць уяўленне пра ўбранне сядзібных дамоў. Гэта апісанні, мемуары, інвентары, карціны, малюнкі і г.д.
У зборах Беларускага дзяржаўнага музея народнай архітэктуры і побыту захоўваецца ўнікальная калекцыя мэблі, якая бытавала ў мяшчанскіх дамах і сядзібных дамах шляхты ў ХІХ – пач. ХХ ст., а таксама калекцыі прадметаў інтэр’ера, побыту гэтага часу.
Экспазіцыйнай пляцоўкай для экспанавання выставы невыпадкова былі выбраны залы Дзяржынскага раённага гісторыка-краязнаўчага музея.
Адной з прычын выбара месца экспанавання была тая акалічнасць, што менавіта сядзіба ў Койданава (да 1932 г. горад Дзяржынск называўся Койданава) у старажытнасці паклала пачатак фарміравання горада.
Акрамя таго вакол Койданава размяшчалася вялікая колькасць сядзібных дамоў: у Станькава, Прылуках, Негарэлым, Коласава – сядзібы Чапскіх; у Малых Навасёлках – сядзіба Кастравіцкіх; у Гаруцішках – сядзіба Пашкевічаў; у Волме – сядзібы Ваньковічаў, Капылінскіх.
Выстава “У пакоі старасвецкія зазірнуўшы” дае прадстаўленне аб асаблівасцях інтэр’ера сядзібнага дома 2-й пал. XIX – пач. XX ст. мяшчан і шляхты: месцы для прыёму гасцей, пакоі для асабістага баўлення часу.
Спадзяемся, што выстава дазволіць адкрыць яшчэ адну старонку ў вывучэнні і захаванні сядзібнай спадчыны, спрычыніцца да абуджэння цікавасці да гісторыі сядзібных дамоў Беларусі.
