У суботу, 10 чэрвеня, Нацыянальны цэнтр сучасных мастацтваў зноў кліча правесці вечар у музеі — на імпрэзе «Сны пра Японію. Прачынаемся».
Дата: 10 чэрвеня
Час: з 17.00 да 20.00 (час мясцовы)
Месца: галреэя «FARBA», пр-т Незалежнасці, 47, Мінск
Тут сабралі амаль усё найлепшае з выставы «Сны пра Японію», якая нядаўна завяршылася ў Цэнтры.
Вось якая чакаецца праграма:
Арт-медытацыя са спяваючымі чашамі, японскай флейтай сякухаці, посахам дажджу і дэгустацыяй кітайскай гарбаты
Будзе шэсць сеансаў медытацыі кожныя паўгадзіны — з 17.00 да 19.30. На арт-медытацыю трэба рэгістравацца. Выбірайце зручны вам час і запісвайцеся па спасылцы.
17:00-18:00 Экскурсія ад арт-куратаркі Дзіны Даніловіч
Куратарка праекта Дзіна Даніловіч раскажа аб сваім бачанні экспазіцыі і пазнаёміць вас са знакамітымі японскімі майстрамі і з беларускімі аўтарамі з экспазіцыі.
17:00-20:00 Іммерсіўны фільм «Сны пра Японію» з жывымі акцёрамі
Перформанс на стыку тэхналогій і мастацтва — імерсіўны фільм «Сны пра Японію» «ажыве» дзякуючы сапраўдным акцёрам. Фільм дае магчымасць прасачыць шматвяковую гісторыю укіё-э і акунуцца ў свет прыгажосці, самабытнасці і гармоніі японскай культуры.
17:00-20:00 Перформанс па стварэнні скульптуры па матывах гравюр Японіі ад Крысціны Анішчанкі
Стварэнне скульптуры з гліны па матывах гравюр Японіі прама на вашых вачах. Назірайце за працэсам лепкі, задавайце пытанні і смела прыкладвайце свае пальцы і рукі да будучага тварэння.
18:00-19:00 Японскі сэт ад T-night
Сэт электроннай музыкі ў стылі фонк, які аддае старым гучаннем і спакойнымі рытмамі ў выкананні T-night
19:00-20:00 Што? Дзе? Куды? Апранаем кімано разам з Ірынай Лампе.
Як кімано дапамагае скідаць лішнія кілаграмы і выпраўляе выправу? Дзе ў кімано кішэні? Чым адрозніваецца анімэшнік ад мастацтвазнаўцы ў дачыненні да кімано?
Прымяраем кімано на шчасліўчыка і адказваем на ўсе самыя нязручныя пытанні аб гэтым адзенні разам з Ірынай Лампе.
19:00-20:00 Лекцыя і майстар-клас «Кінцугі» ад Маргарыты Токаравай
Паслухаеце лекцыю ад культуралагіні Маргарыты Токаравай аб японскай тэхніцы кінцугі і яе месцы ў філасофіі і мастацтве Японіі, выбераце элементы карцін і фатаграфій, якія вам здадуцца блізкімі, і створыце унікальныя калажы, абапіраючыся на ідэю мастацтва кінцугі.
На лекцыю трэба запісацца па спасылцы.
Таксама будзе электронны квэст па выставе, экспазіцыя з 60 унікальных японскіх ксілаграфій і тэматычныя фотазоны.
Квіткі — 20 рублёў. Іх можна набыць па спасылцы. А яшчэ кожны госць атрымае невялікі падарунак.
