Эміграцыя вачыма дзяцей: дакументальная фотавыстава ў Варшаве ў галерэі Stacja Praga

13 верасня 2024 года ў Stacja Praga адкрыецца дакументальная фотавыстава «Эміграцыя вачыма дзяцей», створаная беларускай журналісткай Аксанай Дабрыянец.

Дата: з 13 верасня па 15 кастрычніка 2024 года

Час: адкрыццё выставы адбудзецца 13 верасня 2024 года а 18:00 (час мясцовы)

Месца: Stacja Praga, ul. Zaokopowa 5, Варшава

Выстава раскажа пра жыццё дзяцей, якія былі вымушаны пакінуць Беларусь з-за палітычных падзей апошніх гадоў, а таксама пра дзяцей, якія перажылі двайную эміграцыю з-за вайны ва Украіне.

Выстава прадстаўляе серыю дакументальных фатаграфій дзяцей-эмігрантаў, якія перадаюць іх паўсядзённае жыццё, эмоцыі і адаптацыю да новых рэалій за мяжой.

Пра выставу:

«Эміграцыя вачыма дзяцей» — гэта візуальная хроніка лёсу дзяцей-эмігрантаў і эмігрантак, якія апынуліся далёка ад роднага дому. Праект засяроджваецца на дзецях і падлетках, сем’і якіх былі вымушаны пакінуць краіну ў пошуках бяспекі. Праз фатаграфіі аўтарка паказвае, як дзеці спраўляюцца з пераменамі, знаходзяць новыя шляхі для выражэння сваіх пачуццяў і ўсталёўваюць сувязь з навакольным светам.

Аксана Дабрыянец адзначае: «Кожны кадр — гэта не проста момант іх жыцця, а аповед пра ўнутраную сілу і здольнасць адаптавацца, пра надзею на вяртанне і імкненне знайсці сябе ў новай прасторы».

Экспанаты:

На выставе будуць прадстаўлены:

— Дакументальныя фатаграфіі, якія адлюстроўваюць эмацыйныя і псіхалагічныя аспекты жыцця дзяцей у эміграцыі.

— Тэкставыя інтэрв’ю, у якіх дзеці дзеляцца сваімі ўражаннямі ад новага жыцця.

Праграма адкрыцця:

На адкрыцці выступіць аўтарка праекта Аксана Дабрыянец, а таксама запрошаныя эксперткі, якія працуюць з псіхалагічнай адаптацыяй дзяцей. Вечар завершыцца экскурсіяй па выставе, падчас якой аўтарка раскажа пра гісторыю стварэння кожнай серыі фатаграфій.