17 мая 2017 г. у Малой зале Беларускай дзяржаўнай філармоніі адбудзецца канцэрт “МАЭСТРА КАРАЛЬ ШЫМАНОЎСКІ (1882-1937)” у гонар выбітнага польскага кампазітара.
Выканаўцы – ансамбль салістаў “КЛАСІК-АВАНГАРД”, мастацкі кіраўнік – заслужаны дзеяч мастацтваў Рэспублікі Беларусь Уладзімір БАЙДАЎ.
Кампазітар, піяніст, педагог, пісьменнік, музычны і грамадскі дзеяч, крытык, вандроўнік –
МАЭСТРА КАРАЛЬ ШЫМАНОЎСКІ. На 2017 год прыпадаюць дзве важныя даты, звязаныя з імем Караля Шыманоўскага – 135 год з дня нараджэння кампазітара і 80-я гадавіна яго смерці. З гэтай нагоды 17 мая на сцэне Беларускай дзяржаўнай філармоніі будзе панаваць музычны геній Маэстра.
Караль Шыманоўскі, услед за Фрэдэрыкам Шапэнам, зацвердзіў агульнаеўрапейскае значэнне польскай культуры. У сваёй творчасці ён імкнуўся адлюстраваць вялікія ідэі эпохі – невыпадкова ў сваіх артыкулах ён неаднаразова выказваў думку аб высокім грамадскім прызначэнні мастацтва.
Шыманоўскі ахапіў у сваёй творчасці ўсе жанры: ён напісаў 2 оперы, 2 балета, аперэту, 6 кантат, 4 сімфоніі, музыку для фартэпіяна, скрыпкі, 2 квартэта, вакальныя сачыненні. У выкананні ансамбля салістаў “Класік-авангард” у гэты вечар мы зможам пачуць камерныя і вакальныя творы кампазітара, адзначаныя непаўторнай прыгажосцю, неверагоднымі фарбамі, тонкім гукапісам.
Канцэрт арганізаваны пры падтрымцы Польскага Інстытута ў Мінску.