У суботу, 9 лістапада, у Нацыянальным цэнтры сучасных мастацтваў адбудзецца лекцыя Андрэя Дудчыка «Філасофія і поп-культура: ці можа навука быць вясёлай?», прымеркаваная да Міжнароднага дня філасофіі.
Дата і час: 9 лістапада ў 16.00
Месца: НЦСМ, вул. Някрасава, 3, Мінск
Філосафы часта звярталіся да іроніі і гумару, выкарыстання парадоксаў у навучанні, якія хоць і выклікалі ўсмешку, але прымушалі паслядоўнікаў задумацца аб прыродзе рэчаў. У
спомнім дасціпныя апорыі старажытнагрэцкага філосафа Зянона Элейскага або пацешныя гісторыі Дыягена Лаэрцкага пра філосафаў старажытнасці. Сучасныя спробы падобных інавацый адсылаюць да навуковых коміксаў, якія ператвараюць сур’ёзныя ідэі ў вясёлыя і зразумелыя гісторыі за кошт уключэння дыялогаў, абмеркавання філасофскіх дылем, метафар у агульны фармат гэтага віду арт-практыкі.
Ці можа навуковы гумар на паперы і мастацтва на грані абсурду садзейнічаць развіццю ведаў?
Ці сапраўды навука можа быць вясёлай?
Ці дастаткова для гэтага зірнуць на яе з правільнага пункту гледжання і дазволіць сабе пасмяяцца хаця б над некаторымі яе аспектамі?
Як спрошчаныя візуальныя арт-аб’екты становяцца інструментам фармавання больш вольных фарматаў камунікацыі і папулярызацыі навуковых ведаў (феномен «сайнстэрства»), трансфармацыі сучасных даследаванняў?
І што папулярная культура можа расказаць нам аб існуючых праблемах, а таксама аб балансе сіл і барацьбе ідэй у сучаснай філасофскай навуцы?
Андрэй Дудчык — намеснік дырэктара па навуковай рабоце, кандыдат філасофскіх навук, дацэнт Інстытута філасофіі НАН Беларусі.
Дапамагаць дрэйфаваць па моры незвычайных уяўленняў аб філасофіі і весці інтэрактыўную дыскусію будзе Святлана Дароніна, куратарка праекта, навуковая супрацоўніца Інстытута філасофіі НАН Беларусі.
Квіткі — 15 рублёў (у кошт квітка на лекцыю ўваходзіць прагляд экспазіцыі). Рэгіструйцеся па спасылцы.
