Лекцыя Максіма Сарычава «Выяўляючы схаванае. Паміж журналістыкай і мастацтвам»
03.03.2017
19:00 - 19:00
Прастора "Цэх" (вул. Кастрычніцкая, 16)
Уваход вольны
3 сакавіка а 19:00 у ЦЭХу пройдзе публічная лекцыя беларускага фатографа Максіма Сарычава «Выяўляючы схаванае. Паміж журналістыкай і мастацтвам».
Як можна візуалізаваць мінулае і паказаць тое, чаго няма? Як новыя каналы камунікацыі робяцца сёння прастораю ды інструментам мастацкіх практык? Што адбываецца на мяжы мастацтва, візуальных медыяў, дакументу, журналісцкіх расследаванняў і новых тэхналогіяў?
Аповед будзе грунтавацца на праектах фатографаў/мастакоў, якія працуюць з рэальнасцю, але выходзяць пры гэтым за межы дакументальнай фатаграфіі, эксперыментуюць з візуальнай мовай і канцэптуальнасцю. У тым ліку гаворка пойдзе аб працы над тэмамі вайсковых канфліктаў і злачынстваў, цэнзуры, дзяржаўнай бяспекі, парушэння правоў чалавека, карупцыі.
Лекцыя пройдзе ў межах персанальнай выставы аўтара «Сляпая зона», даступнай у прасторы ЦЭХ да 6 сакавіка 2017 года.
Максім Сарычаў – адзін з найбольш вядомых візуальных мастакоў Беларусі, які працуе з тэмай улады і грамадства. Сярод ягоных прафесійных дасягненняў – шматлікія ўзнагароды ў нацыянальных конкурсах і ўдзел у міжнародных фестывалях, такіх як Warsaw Photo Days 2013 (Польшча), Vilnius Photo Circle 2013, 2014, 2016 (Літва), Tbilisi Photo Festival 2016 (Грузія). Сарычаў – пераможца важных фотападзеяў Беларусі: конкурсаў PRAFOTA 2015 і Belarus Press Photo 2015. Удзельнік калектыву мастакоў LĒD.
