Анлайн-прэзентацыя новай кнігі Віктара Марціновіча
17.02.2026
19:00 - 20:00
анлайн (анлайн)
Бясплатна
У аўторак, 17 лютага, адбудзецца анлайн-прэзентацыя кнігі Віктара Марціновіча "Беларусь у аўтаэтнаграфічных наратывах".
"Гэтая кніга мусіла (рызыкавала?) стаць выключна тэарэтычнай. Але пасля серыі размоваў з калегамі ў Нью Ёркскім Хантэр Каледжы я зразумеў, што найлепшы шлях заявіць пра arts as a new language of humanities - не ціснуць развагамі, але падаць прыклад.
Трэба было знайсці гісторыю - настолькі добра вядомую мне, што я з яе складаюся.
Гэта кніга пра майго прадзеда Амяляна, спачатку - дзеншчыка царскага войска, потым млынара, потым - селяніна пад нямецкай акупацыяй. Чалавака, які быў расстраляны нацыстамі ў 1943-м годзе такім чынам, што, калі я першы раз прачытаў Сотнікава Быкава, я думаў, што Васіль Уладзіміравіч нешта ведаў пра Амяляна. Трагедыя ўцягнула іншых людзей, і завітала нават у маё дзяцінства.
Гісторыя беларускага селяніна Амяляна расказана тут праз творы Рафаэля, Шагала, Сандра Бацічэллі, Каспара Давіда Фрыдрыха, Станіслава Жукоўскага, Хаіма Суціна. Няма лепшага чыну для расповеда пра рэйд шуцманшафта ў вёску Барбарова, чым крыклівае дрэва, напісанае Суціным у 1943 у парку такой самай вёскі ля Шампіньі-сюр-Вёд, дзе ён хаваўся ад нацыстаў", - піша спадар Віктар.
Падчас анлайн-прэзентацыі спадар Віктар прадставіць абраныя фрагменты з кнігі і адкажа на пытанні ўдзельнікаў.
Сустрэча пройдзе на беларускай і англійскай мовах.
Удзел вольны. Рэгіструйцеся па спасылцы.
Дата і час: 17 лютага ў 19.00 (час мінскі, гэта 18.00 па Вільні і 17.00 па Варшаве)
