Опэнінг-паці радыё «Плато»

«Я з “Плато”, а ты хто?» У Менску з’явілася інтэрнэт-радыё, якое вырашае спрадвечнае пытанне: «Што зараз паслухаць?»

Два беларускіх дзіджэя Stereobeaver і KorneJ запусцілі радыёстанцыю, у эфіры якой граюць як класічныя нятленкі і аўтэнтычны world music, так і актуальнае індзі, рытмічныя эдзіты і густоўныя беларускія рэлізы. Галоўны акцэнт – музыка, якую заўжды можна ўключыць у сяброўскай кампаніі, а таксама падчас працы, адпачынку і нават сну.

«Мы раздзялілі эфір на некалькі часавых перыядаў. Так, напрыклад, раніцай граюць бадзёрыя кампазіцыі, ад якіх хочацца выпрастаць плечы і рынуцца ў бой з паўсядзённымі справамі; днём – больш спакойная, фонавая музыка, пад якую зручна працаваць; вечар мы дзелім на дзвіжовы і чыловы, а ноччу пагружаемся ў бязмежны эмбіент. Па пятніцах і суботах у нас – клубныя паці», – распавядаюць стваральнікі.

«У дзяцінстве шмат хто марыў адкрыць свой бар альбо радыё, – працягваюць яны. – Мы выбралі чырвоную пігулку. Дастаткова было сустрэцца толькі двум аднадумцам, каб дзіцячая фата-маргана здабыла фізічныя контуры. Некалькі месяцаў сышло на падрыхтоўку – і мы маем паўнавартасны эфір улюбёных кампазіцый, якія самі ахвотна слухаем, а таксама дзелімся імі з сябрамі».

Зараз радыёстанцыя працуе ў рэжыме кругласутачнага джукбоксу, але з цягам часу плануюцца штотыднёвыя жанравыя рубрыкі, аўтарскія перадачы, інтэрв’ю з музыкамі, а таксама стрымы з вечарынак. Так што, калі маеш ідэю супрацоўніцтва, пішы на hey@radioplato.by.

А каб адчуць вайб жыўцом, радыё «Плато» запрашае 28 верасня на опэнінг-паці ў «Хуліган». За пульт устануць Stereobeaver і KorneJ, якіх ты, хутчэй за ўсё, памятаеш па Hangover Party ад 34mag, а таксама адмысловы госць з Літвы Justicious, які ведае пра сучасныя клубныя трэнды амаль усё.

Івэнт у FB https://facebook.com/events/288026068675435/

Івэнт у VK https://vk.com/radioplato_launchparty

Радыё «Плато» ў сеціве:

Сайт https://radioplato.by/

VK https://vk.com/radioplato

Facebook https://www.facebook.com/radioplato.by/

Instagram https://www.instagram.com/radio_plato/

Mixcloud https://www.mixcloud.com/radioplato/