Прэзентацыя кінапраекта «Johnny Cosmic Effect» у Вільні

У чацвер, 18 чэрвеня, у Вільні адбудзецца прэзентацыя кінапраекта рэжысёра-дакументаліста Максіма Шведа «Johnny Cosmic Effect».

Гэта дакументальны фільм пра Джоні Косміка (Івана Смаляра) — беларускага фатографа, імя якога прагрымела напачатку года выставай у Варшаве.

Імпрэзу ў якасці падарунка да дня народзінаў творцы арганізавала беларуская культурная супольнасць.

Метад Johnny Cosmic можна апісаць як паломніцтва ў фатаграфію як у прысутнасць. У Мінску ён гадамі рабіў на вечарынах фотаздымкі людзей, каб потым бясплатна раздаць іх сваім героям. Гэта практыка прадоўжылася і ў эміграцыі, у Варшаве, куды пераехаў творца.

Спачатку гэта напружвала: ён нічога за гэта не прасіў (і гэта было крыпі), не ўсе на гэтых здымках сабе падабаліся, але з часам, як мае быць беларусам, прызвычаіліся. Ваня стаў неад’емнай часткай культурна-тусовачнага жыцця; яго пачалі пазнаваць, сябе на ягоных здымках — любіць.

Рэжысёр Максім Швед засняў ключавыя моманты «вечарынкі шчасця» для Івана Смаляра, ды не толькі іх: падрыхтоўку да дня народзінаў, кульмінацыю, і тое, што будзе далей.

Ён называе свае кіно «фрактальнай дакументалістыкай» — яно памнажаецца на некалькі рэальнасцяў: кіно як кропка далучэння і зменаў, і сведка таго, што адбываецца.

• На што яшчэ здольны эфект Джоні Косміка?
• Як ён паўплывае на самога Ваню і на нас усіх?
• Гэта выключна беларуская з’ява ці ўніверсальная гісторыя?
• Як Ваня распарадзіцца сваім новым капіталам, які выйграў у кармічнай латарэі?