ПАДЗЕЯ ДНЯ: Прэзентацыя рамана «Свінні» Аляксандра Чарнухі ў Варшаве
Пачатак: 06.05 (19:00)Канец: 06.05 (21:00)
Беларускі Моладзевы Хаб
6 траўня Беларускі Моладзевы Хаб у Варшаве ладзіць прэзентацыю дэбютнага рамана Аляксандра Чарнухі «Свінні».
Дата: 6 траўня
Час: 19.00 (час мясцовы)
Месца: Беларускі Моладзевы Хаб, пляц Канстытуцыі, 6, Варшава
Раман «Свінні» — гэта несусветная гісторыя аднаго выдуманага райцэнтра ў неіснуючай дзяржаве. Вядома, чытач хутка разбярэцца ў сістэме каардынат і прыдумае прыдатную назву для гэтай краіны.
Чыноўнікі, якія страцілі сувязь з рэальнасцю і якія пасылаюць адзін аднаму важныя, але ад гэтага яшчэ больш смешныя факсы; сілавікі ў балаклавах, якія добра выконваюць толькі адну задачу — ахоўваюць помнік Леніну; спіты рэдактар раённай газеты, што строчыць атрутныя пасквілі пра нябачнага ворага; грозная дырэктарка дома культуры, якая ўмее толькі выпальваць цэнзурай любую песню. Усе гэтыя выявы даведзены да абсурду, але пры гэтым захоўваюць сувязь з рэальнасцю: усе апісаныя ў кнізе падзеі, дыялогі і ўчынкі маглі б адбыцца насамрэч. І, магчыма, сапраўды адбываліся.
На прэзентацыі можна будзе паслухаць урывак з рамана, задаць пытанні аўтару, а таксама набыць кнігу.
Адмысловы госць імпрэзы — NaviBand.
Аляксандр Чарнуха — беларускі журналіст, які больш за дзесяць год працаваў у незалежных медыя. «Свінні» — гэта дэбютны раман аўтара, які ён пачаў пісаць у кастрычніку 2020 года, калі здавалася, быццам вось-вось з’явіцца вольнае паветра, а скончыў у красавіку 2021 года, калі паветра ў Беларусі не засталося зусім.
