Прэзентацыя альбома «хроснай маці беларускага акцыянізу»

6 лютага (пятніца) у 19-00 у кнігарні «логвінаЎ» адбудзецца пілотная прэзентацыя альбома «ЛЮДМІЛА РУСАВА» з «Калекцыя пАРТызана» , дзе ўпершыню сабраныя дакументацыя і працы — ад жывапісу і габеленаў да калажаў і перформансаў — выбітнейшай беларускай мастачкі 1980-90-х Людмілы Русавай (1954 — 2010).

У 2012 годзе ў серыі «Калекцыя пАРТызана» выйшаў альбом «Беларускі авангард 1980-х», першае і адзінае на сённяшні дзень выданне, дзе ў хроніцы, імёнах і працах зафіксаваная адна з найважнейшых старонак нашай сучаснай гісторыі. Рэзананс, які выклікаў гэты каталог, стаўся для праекта «pARTisan» імпульсам адкрываць і далей «забытыя» феномены і аўтараў, без якіх немагчыма ўявіць сабе сучаснае беларускае мастацтва. І ўжо тады было зразумелым, што немагчыма яго ўявіць без асобы Людмілы Русавай.

«Пра Людмілу Русаву ў 1990-х казалі як пра лідара руху авангарду ў Беларусі, хросную маці беларускага акцыянізму. Яна аўтар першага перформансу і першай арт-кнігі ў Беларусі. Людміла Русава працавала ў розных жанрах мастацтва, не баялася эксперыментаў. У выніку з’явіліся шэраг жывапісных палотнаў, аб’екты, інсталяцыі, фотакалажы, перформансы, відэапраекты, арт-кніга і многае іншае. Праекты і даследаванні Русавай заўжды злучаліся з перадавымі ідэямі сусветнага мастацтва. Віртуальнымі апанентамі для яе былі такія прызнаныя майстры, як Іў Кляйн, Марына Абрамавіч, Андрэй Таркоўскі, Казімер Малевіч. «Творчая біяграфія» Людмілы Русавай — гэта ўдзел у прыблізна 100 выставах і праектах, палова з якіх, паводле ейнага вызначэння, «чыста авангардныя».» (Наталля Янкоўская. Кніга. Людміла Русава).

У прэзентацыі прымуць удзел: Наталля Янкоўская, Адам Глобус, Вольга Сазыкіна, Таня Сяцко, а таксама сябры і калегі мастачкі. Будзе дэманстравацца відэа з працамі мастачкі, а таксама выстаўлена арт-кніга Людмілы Русавай з калекцыі Наталлі Янкоўскай.

6 лютага, 19-00

Кнігарня «логвінаЎ» (пр. Незалежнасці 37а)