прэзентацыя перавыдання «Расійска-беларускага слоўніка» Некрашэвіча і Байкова ў Маладзечне
Пачатак: 07.12 (17:00)Канец: 07.12 (19:00)
Гасцёўня
У нядзелю, 7 снежня, у гасцёўні на Чыстай, 26 адбудзецца прэзентацыя свежага нумара часопіса ARCHE «Заходняя Беларусь. Міжваенны перыяд» з удзелам рэдактараў выдання Валера Булгакава і Алеся Пашкевіча. У рамках імпрэзы адбудзецца першая ў Беларусі прэзентацыя трэцяга выдання слоўніка Некрашэвіча-Байкова.
Заходнебеларуская спадчына — гэта шмат ў чым «нязручнае мінулае». Яно было такім у савецкі час, а з пэўнымі зменамі ды мадыфікацыямі застаецца і цяпер. Натуральна, дзякуючы высілкам акадэмічнай супольнасці, асабліва за апошнія 25 гадоў, было шмат зроблена для лепшага разумення і асэнсавання як міжваеннага перыяду ды вераснёўскіх падзей, так і асаблівасцяў ды месца Заходняй Беларусі ў пасляваеннай БССР. Шмат «белых плямаў», аднак, застаецца і сёння.
Поўны змест нумара даступны ТУТ.
Новае выданне «Расійска-беларускага слоўніка» Сцяпана Некрашэвіча і Міколы Байкова гэтым разам выйшла ў цвёрдай вокладцы.
Гэта перавыданне найлепшага і найпаўнейшага расійска-беларускага слоўніка міжваеннага часу, першае выданне якога з’явілася ў 1928 годзе. Слоўнік уключае больш за 60 тысяч слоў і быў створаны паводле выбаркі лексікі са «Словаря белорусского наречия» Івана Насовіча, «Смоленского областного словаря» Уладзіміра Дабравольскага, «Беларуска-польска-рускага слоўніка» Язэпа Ціхінскага, «Віцебскага краёвага слоўніка», «Практычнага вайсковага слоўніка», рукапісных слоўнікаў Паўла Шпілеўскага і С. Мядзведскага, а таксама з выбраных літаратурных твораў і народнай мовы. Аўтары імкнуліся ўхіляцца ад штучных новатвораў: перавагу аддавалі словам, якія існуюць у народнай і літаратурнай мове.
Поўны змест кнігі даступны ТУТ.
Пачатак прэзентацыі а 17.00.
Даведкі па тэлефоне +375 29 550 79 69.
