Публічная лекцыя Штэфана Гарштэцкага « Ці магчымая еўрапеізацыя знізу?»

Феномен «еўрапеізацыі зверху» зразумелы ўсім: нацыянальная палітыка краін ЕС часта вызначаецца агульнаеўрапейскай палітыкай і створанымі для гэтага механізмамі. Але існаванне адзінай Еўропы было б немагчымае без «еўрапеізацыі знізу» ці, як гэта яшчэ прынята казаць, гарызантальнай еўрапеізацыі. Што гэта такое? Па-першае, гаворка ідзе пра дзеянні нацыянальных і субнацыянальных актараў (НДА, рэгіёнаў і саміх палітыкаў), а па-другое, узаемадзеянне ажыццяўляецца па-над межамі, паміж краінамі ЕС. Велізарную ролю набываюць сёння сацыяльныя рухі, дзейнасць партый і НДА, якія арыентуюцца на кантакты са сваімі калегамі ў Еўрапейскім Саюзе. Еўрапейскае адзінства ствараецца не толькі «зверху», але і «знізу» – дзякуючы ўзаемадзеянню і кантактам унутры грамадзянскай супольнасці.

Лекцыя Штэфана Гарштэцкага будзе прысвечаная аналізу феномена «еўрапеізацыі знізу», тым праблемам, з якімі сутыкаюцца краіны Еўропы, калі спрабуюць будаваць сваё развіццё, абапіраючыся на ініцыятывы, якія ідуць ад грамадства да дзяржавы, а не наадварот. Таксама будзе абмяркоўвацца пытанне аб тым, ці могуць працэсы еўрапеізацыі аказваць дзейсны ўплыў на краіны па-за межамі ЕС, напрыклад, на Беларусь.

Штэфан Гарштэцкі (Stefan Garsztecki) – палітолаг, гісторык, прафесар кафедры краіназнаўства і вывучэння культуры Тэхнічнага ўніверсітэта г. Хемніцы, чалец шэрагу акадэмічных нямецкіх і нямецка-польскіх арганізацый, сярод якіх Нямецкае таварыства палітычных навук і Нямецкае таварыства даследаванняў Усходняй Еўропы (DGO). Адна з пяці яго калектыўных манаграфій, падрыхтаваная Гарштэцкім да выдання ў 2008 г., носіць назву «Груз гісторыі? Калектыўная ідэнтычнасць і гісторыя ва Усходняй Еўропе. Беларусь , Польшча , Літва і Украіна».

З тэкстам Штэфана Гарштэцкага «Актуальныя вымярэнні Еўропы ў Цэнтральнай І Усходняй Еўропе – еўрапеізацыя знізу?» можна пазнаёміцца тут.

Мова лекцыі: англійская з паслядоўным перакладам на рускую.

Уваход вольны!