Размова “Функцыі культуры ў грамадстве”

Навошта нам культура?

Функцыя мікрахвалёвай печкі – падаграваць ежу, прызначэнне праса – прасаваць бялізну. Калі функцыянальнасць нейкай рэчы дамашняга ўжытку псуецца ці нам невядомая – гэта рэч становіцца цалкам бескарыснай. Якія функцыі павінна мець культура, каб яна была карыснай для жыхароў горада?

ГА “Цэнтр “Трэці Сектар” прапануе абмеркаваць тэму “Функцыі культуры ў грамадстве” культурныя дзеячам і ўсім зацікаўленым гарадзенцам.

Нярэдка лічыцца, што размовы не вядуць да канкрэтных вынікаў. Але, на нашу думку, гэта залежыць ад таго, хто і як размаўляе. Акурат у размове адна асоба мае магчымасць непасрэдна сутыкнуцца з іншай. Акурат на гэтым памежжы ўяўленняў, досведаў, чаканняў ўзнікаюць новыя ідэі і думкі. З іншага боку, любая дзейнасць набывае глыбіню і шматмернасць, калі яна мае пад сабою канцэптуальную глебу.

Гутарка пойдзе ў не зусім тыповым фармаце. У якасці базы для размовы мадэратарка Ірына Герасімовіч прапануе выкарыстаць прынцыпы, якіх прытрымліваецца методыка Сакратаўскай бяседы ў традыцыі Леанарда Нэльсана і Густава Хэкмана.

 “Гэтая методыка пры дапамозе пэўных правіл стварае прастору для таго, каб кожны мог абмяркоўваць пэўную тэму згодна са сваімі патрэбамі і інтарэсамі, а таксама  браць на сябе адказнасць за ступень уласнай актыўнасці ці пасіўнасці”, – кажа мадэратарка Ірына Герасімовіч.

Падчас размовы ўдзельнікі будуць мець магчымасць сфармуляваць рэлевантныя для абмеркавання пытанні і паспрабуюць даць на іх адказы. Супольны працэс будзе накіраваны на пошук адказу на кожнае пытанне, з якім зможа пагадзіцца КОЖНЫ ўдзельнік групы. Штораз гэта будзе агульны адказ, пра які кожны ўдзельнік зможа сказаць: так, гэта і МОЙ адказ таксама.

Арганізатары спадзяюцца, што дадзеная размова стане нагодай для ўдзельнікаў паглыбіць ўяўленне пра ўласную дзейнасць, а, можа, і прыадкрые новыя накірункі для прафесійнага развіцця, творчага супрацоўніцтва і адстойвання сваёй ролі ў культурным жыцці горада.

14 лістапада, Гродна, офіс ГА “Цэнтр “Трэці Сектар”  (вул. Будзёнага 48а – 63)

Пачатак 18.30

(+37529 7843221, Хрысціна Марчук)