Дзве ракі, сустрэўшыся, нараджаюць бурлівую плынь. Два гурты, зайграўшы разам, выпраменьваюць непаўторную энергетыку. Менавіта таму аўтары найлепшага рок-альбому 2015 гурт Re1ikt і найлепшага фольк-альбому 2014 гурт Vuraj аб’ядналіся, каб даць вялікі сумесны канцэрт 29-га траўня ў клубе «Брюгге». Адмысловую праграму музыкі назвалі сімвалічна, па назве сустрэчы дзвюх рэк – «Сутокі».
Фольк-гурты Re1ikt і Vuraj – з’ява для беларускай музыкі нетрывіяльная. Яднае іх шчырая захопленасць беларускай народнай песняй і любоў да эксперыментаў.
Лідар гурта Vuraj Сяргей Доўгушаў адзначае: «Ідэя музычнай супрацы з Re1ikt прыцягвала нас даўно. Гэты саюз бачыўся нам настолькі натуральным і арганічны, што пытаннем было толькі тое, калі мы нарэшце з’яднаем нашы творчыя энергіі. І вось, пасля некалькіх удалых спробаў мы наважыліся на вялікі канцэрт. 29-га траўня мы прадставім шэраг сумесных песень з нечаканымі нават для нас саміх спалучэннямі».
Вакаліст гурта Re1ikt Уладзімір Казлоў працягвае: «Гэты канцэрт – своеасаблівая абмен-гульня. Сяржук заспявае з Re1ikt, а я, у сваю чаргу, выканаю пару песень разам з Vuraj. Але, вядома, асаблівае месца мы адводзім палескаму хіту «Вэлытай, пэрэпылко». Яго мы сумесна выканаем у адмысловай аранжыроўцы. Мы ўпэўненыя, што новае гучанне прыйдзецца да спадобы аматарам абодвух гуртоў».
Акрамя сумесных песень, гурт Vuraj прэзентуе новую містычную праграму, створаную на аснове палескіх песень, якія музыкі збіралі ў экспедыцыях апошнія чатыры гады.
Таксама гасцей канцэрту чакаюць сюрпрызы ў плане гучання: песні Vuraj упершыню можна пачуць разам з колавай лірай, якая ў многіх момантах нават заменіць гітару, а Re1ikt будзе здзіўляць слухачоў iгрой на электра-мандоле.
Суполькі канцэрт Re1ikt і Vuraj адбудзецца ў клубе «Брюгге» па адрасе Партызанскі пр-т, 6А. Пачатак у 19:00.
Даведка па тэл.: +375(29) 8604215 +375(29) 6940740
