Спектакль «Ціхі шэпат сыходзячых крокаў»
29.06.2021
19:00 - 20:00
Voka
Бясплатнае
29 чэрвеня відэасэрвіс VOKA пакажа ў прамым эфіры спектакль «Ціхі шэпат сыходзячых крокаў» Рэспубліканскага тэатра беларускай драматургіі. Трансляцыю змогуць бясплатна ўбачыць гледачы па ўсім свеце. Пачатак анлайн-паказу – а 19-й гадзіне па мінскім часе.
«Ціхі шэпат сыходзячых крокаў» – сумесны праект Міжнароднай канфедэрацыі тэатральных саюзаў і Рэспубліканскага тэатра беларускай драматургіі. Рэжысёр з Кыргызстана Шаміль Дыйканбаеў паставіў яго па п’есе папулярнага беларускага драматурга Дзмітрыя Багаслаўскага. Прэм’ера адбылася ў 2013 годзе.
Галоўны герой Аляксандр пакутуе ад таго, што бацька ніколі не казаў, ці любіў ён яго. Хваляванні з рэальнага жыцця пераносяцца ў дакучлівыя сны, у якіх ён сустракае свайго бацьку, каб хоць там даведацца пра яго пачуцці да сына. «Ціхі шэпат сыходзячых крокаў» – спектакль, у якім цалкам сціраецца мяжа паміж жыццём і смерцю, сном і рэальнасцю.
Пастаноўку ўжо бачылі гледачы і за межамі Беларусі – яго паказы з поспехам прайшлі на ХХІ Міжнародным фестывалі «Славянскія тэатральныя сустрэчы» (Бранск, 2014 год), ХІІ Міжнародным тэатральным фестывалі імя А.П. Чэхава (Масква, 2015 год) і Днях культуры Беларусі ў Кыргызстане (Бішкек, 2015 год). А зараз такая магчымасць ёсць і ў гледачоў па ўсім свеце дзякуючы сэрвісу VOKA.
Далучыцца да прагляду 29 чэрвеня можна з любой кропкі свету ў прыкладанні VOKA ці на сайце voka.tv пасля аўтарызацыі па нумары мабільнага тэлефона. Шматкамерная мастацкая здымка ў высокай якасці дазволіць кожнаму гледачу максімальна паглыбіцца ў атмасферу тэатральнай залы і ўбачыць усё, што адбываецца на сцэне, з розных ракурсаў.
Паказ спектакля працягвае серыю трансляцый, якія ўжо больш за год відэасэрвіс VOKA праводзіць з Рэспубліканскага тэатра беларускай драматургіі. Дзякуючы гэтаму гледачы змаглі ўбачыць анлайн-прэм’еру «Профіт», найпапулярнейшыя спектаклі РТБД – «Кар’ера доктара Рауса», «Сірожа», «Шлюб з ветрам», «Тры Жызэлі» і «Сіндром Медэі», а таксама святочны вечар «Наш Караткевіч», прымеркаваны да 90-годдзя Уладзіміра Караткевіча.
