Здавалася б, што задача СМІ – асвятляць як мага больш падзеяў. Але часам незаслужана абмінаецца ўвагай дзейнасць грамадскіх актывістаў, якія займаюцца вырашэннем важных грамадскіх і сацыяльных праблемаў. Праз недахоп інфармацыі многія грамадскія ініцыятывы застаюцца па-за ўвагай кожнага з нас. З іншага боку, самі актывісты далёка не заўсёды могуць так падаць інфармацыю, каб зацікавіць ёю журналістаў і блогераў.
Як змяніць гэтую сітуацыю? Якім чынам грамадскім актывістам зацікавіць сваёй дзейнасцю тых, хто піша, а медыям – убачыць сярод вялікай колькасці падзеяў сапраўды значную сацыяльную з’яву, якая з дапамогай СМІ можа і павінная выклікаць шырокі рэзананс у грамадстве? Як расказаць гісторыю пра валанцёра ці грамадскае аб’яднанне, якую прачытаюць тысячы? У Лідзе ўжо даўно наспела неабходнасць паразмаўляць пра ўсё гэта.
Грамадская культурніцкая кампанія “Будзьма беларусамі!” і Цэнтр даследавання грамадскага кіравання SYMPA запрашаюць журналістаў, блогераў і грамадскіх актывістаў Ліды абмеркаваць гэтыя важныя пытанні і разам знайсці магчымыя рашэнні на сустрэчы прэс-клуба разам з цікавымі і дасведчанымі спікерамі:
Яся Каралевіч-Картэль (Мінск), рэдактарка інтэрнэт-часопіса пра Мінск CityDog.by;
Аляксей Шота (Гародня), галоўны рэдактар Hrodna.life;
Алег Валадкевіч (Ліда), лідар веласупольнасці Ліды.
Вы – грамадскі актывіст, ладзіце цікавыя мерапрыемствы, абараняеце і прасоўваеце грамадскія інтарэсы і пра вас не піша прэса? Спытайце, чаму!
Вы – журналіст ці блогер, і грамадскія актывісты дасылаюць вам няўцямную інфармацыю ці нецікавыя запрашэнні? Падзяліцеся, як пісаць так, каб гэта вас зачапіла.
24 лютага, Ліда, Ga11ery, бульвар Гедыміна, 12-11
Пачатак: 17:00
