Выстава «Арнаменты Падняпроўя: Сон і абуджэнне» ў Гомелі
07.03.2024 - 07.04.2024
16:00 - 18:00
філіял Веткаўскага музея (пл. Леніна, 4а)
Бясплатнае
У чацвер, 7 сакавіка, у філіяле Веткаўскага музея адкрываецца выстава «Арнаменты Падняпроўя: Сон і абуджэнне».
Дата: 7 сакавіка
Час: 16.00
Месца: філіял Веткаўскага музея, пл. Леніна, 4а, Гомель
Падняпроўе — рэгіён найбольш выразных і багатых у сваёй разнастайнасці мастацкіх традыцый абрадавых ручнікоў. Арнаментам Падняпроўя музей прысвяціў вялікі праект пад назвай «Адкуль родам знакі на нашых ручніках?»
На першай выставе ў межах праекта прэзентавалі арнамент «Крючча». І вось надышоў час пазнаёміць вас з наступным знакам — «Сон і абуджэнне».
На белым абрусе, на белявой кашулі, на белым жаночым «платку» і, безумоўна, на ручніку — на ўсім тканым космасе Неглюбкі жывуць «вядзьмедзі». Яны ж «мядзьведзькі». Ёсць «бальшыя» і «малыя», «сляпыя» і «зоркія». І ўсе яны ходзяць «па мяжы».
Мядзведзь — архаічны знак звера-татэма. І гэта сон Зямлі.
Калі «вядзьмедзь» — сон Зямлі, то чым узорныя тканіны пазначаюць -выклікаюць яе абуджэнне? Вадой! «Дзе маці плачэ — там рака цячэ...». Дарэчы, яшчэ адзін абрадавы локус — калодзежы і крыніцы: «Дзе сястрычанька — там крынічанька», альбо «там калодзежы...»
У шмат якіх тэкстах традыцыі можна знайсці рэцэпты ўзнаўлення. У тэкстылі, узорным ткацтве — гэта «сон і абуджэнне», дзеля таго, каб узнавіць цэласнасць космасу, выратаваць ад энтрапіі забыцця.
То прыходзьце пабачыць на ўласныя вочы тыя касмаганічныя вышытыя тэксты і расшыфраваць іх.
Уваход вольны.
