З 7 па 9 лістапада ў Познані прагучаць беларускія словы, што адольваюць межы, і думкі, якія натхняюць на дыялог. На некалькіх пляцоўках горада пройдуць прэзентацыі новых кніг, творчыя сустрэчы, літаратурныя дыскусіі і музычныя імпрэзы.
У праграме разнастайнасць тэм: гісторыя і сучаснасць, літаратура і актуальныя сацыяльныя пытанні, фантастыка і паэзія, мастацкія перформансы і прафесійныя размовы для тых, хто хоча быць у цэнтры культурнага жыцця.
Асаблівасць познанскай праграмы — асобная дзіцячая пляцоўка, тэатральныя і кінападзеі, якія дапамагаюць убачыць сучасную Беларусь у розных вымярэннях.
Важнай падзеяй першага дня фестывалю стане дыскусія «Зялёны ліст, чырвоны цвет...»: савецкая ўтопія і беларуская паэзія«. Літаратуразнаўца Марына Казлоўская і паэт Андрэй Хадановіч паразважаюць пра пакаленне паслухмяных і непаслухмяных дзяцей Кастрычніка, пра межы творчай свабоды і пра тое, як сістэма ўплывала на беларускіх паэтаў — ламаючы хрыбет натхненню, знішчаючы творы і саміх аўтараў.
Не прапусціце тэатральныя падзею (партнёрская імпрэза Teatr Ósmego dnia):
спектакль «Say hi to Abdo» паводле дакументаў і сведчанняў міграцыйнага крызісу на беларуска-польскай мяжы і сустрэчу з аўтарам п’есы Мікітам Ільінчыкам.
Маленькіх наведнікаў фестывалю чакаюць сустрэчы з дзіцячымі пісьменнікамі і ўнікальныя інтэрактыўныя чытанні «Шчасце — гэта ліса», а дарослых — жывыя размовы пра літаратуру і эміграцыю, бестселеры і фемінізм, праўду, мацнейшую за страх, і дакладныя навукі па-беларуску.
Фіналам другога фестывальнага дня стане Ноч паэзіі, на якой выступяць Ганна Шакель, Юля Цімафеева, Альгерд Бахарэвіч, Вера Бурлак, Андрэй Хадановіч, Данііл Вашкевіч, Уладзь Лянкевіч.
У нядзелю пройдзе цырымонія абвяшчэння лаўрэатаў прэміі Цёткі за 2023 і 2024 гады; размовы пра навінкі серыі «Галерэя чалавечай думкі» і аўтафікшн у Беларусі і свеце.
У чытачак і чытачоў будзе магчымасць пазнаёміцца з новымі кнігамі і выдавецтвамі, знанымі аўтарамі і дэбютантамі, завітаць на музычна-літаратурныя прэзентацыі Артура Камароўскага і Фрыдрыха Самотнага.
Завершыць фестываль выступ Кміт-ансабля і танцавальная вечарына «Танцы ў Пазнаньцы».
PRADMOVA ў Познані — гэта не толькі тры дні насычанай праграмы, але і адкрытая платформа для дыялогу, супольных пошукаў і творчага эксперыменту. Тут традыцыі сустракаюцца з інавацыямі, а асабістыя гісторыі пераплятаюцца з агульнанацыянальнымі дыскусіямі. Далучайцеся да супольнасці, што развівае і падтрымлівае беларускую культуру.
Поўная праграма фестывалю і дадатковая інфармацыя даступныя на афіцыйным сайце PRADMOVA.
