Выстава «Калі яго парушыць, яно становіцца адчувальным» у Вільні
31.03.2023 - 18.06.2023
18:00 - 20:00
Нацыянальная галерэя мастацтваў (Konstitucijos, 22)
10 еўра
У пятніцу, 31 сакавіка, у Вільні адкрываецца выстава з дзіўнай і складанай назвай «Калі яго парушыць, яно становіцца адчувальным. Інфраструктуры і салідарнасць па-за межамі постсавецкай прасторы».
Куратары — Аляксей Барысёнак і Антаніна Сцебур.
Дата: 31 сакавіка
Час: 18.00 (час мясцовы)
Месца: Нацыянальная галерэя мастацтваў, Konstitucijos, 22, Вільня
Куратары адштурхоўваюцца ад паняцця інфраструктуры, якая разумеецца як спосаб размеркавання і арганізацыі адносін улады.
Постсавецкія інфраструктуры былі пабудаваныя на руінах ваенна-прамысловых комплексаў і ўбудаваныя ў складаныя матэрыяльныя і нематэрыяльныя адносіны каланіялізму, аўтсорсінгу, рэсурсаў і знешніх эфектаў.
Такія сеткі інфраструктуры, як чыгунка, газаправоды, валаконна-аптычныя кабелі, каналы Telegram і сістэмы відэаманіторынгу (сярод многіх іншых), застаюцца нематэрыяльнымі ў паўсядзённым жыцці. У той жа час іх збой, адключэнне або перапыненне выкрывае працу ўсёй інфраструктуры і іх узаемасувязь — улада і яе матэрыяльнасць літаральна аказваюцца бачнымі, прыземленымі і ўвасабляюцца праз збой і перапыненне.
Поўнамаштабнае расійскае ўварванне ва Украіну і нядаўнія палітычныя пратэсты ў розных краінах былога СССР — Беларусі, Украіне, Казахстане, Кыргызстане, Грузіі і Арменіі — дэманструюць актывісцкі і валюнтарысцкі патэнцыял саміх тэхналогій.
У выставе бяруць удзел мастакі з розных постсавецкіх краін, і з Беларусі таксама: Тэкла Асланішвілі і Георгі Гага Гагашыдзэ, Марыям Медэт, Яўгенія Беларусец, eeefff, Ганна Энгельхардт, fantastic little splash, Уладзімір Грамовіч, рэдакцыйны калектыў Музея камянёў, Аляксей Радынскі, Аліцыя Рагальская, Сабінэ Шнэ, Намеда і Гедымін Урбон, XYANA.
Некаторыя з іх стварылі новыя работы адмыслова для выставы.
У дзень адкрыцця, 31 сакавіка, а 19-й адбудзецца і куратарская экскурсія па выставе. Таму завітвайце!
Працуе выстава па 18 чэрвеня.
