Выстава «На вашых магілах мы справім вяселле. За межамі фотаархіва VEHA» ў Капенгагене
07.06.2024 - 16.06.2024
12:00 - 19:00
POP-UP Copenhagen (Ingerslevsgade 124)
Бясплатнае
У пятніцу, 7 чэрвеня, у межах Капенгагенскага фэста фатаграфіі адкрываецца выстава «На вашых магілах мы справім вяселле», у якой бяруць удзел мастакі з Беларусі, Польшчы і іншых краін.
Дата: 7 чэрвеня
Час: адкрыццё — з 12.00 да 21.00, уступнае слова — 18.00 (час мясцовы)
Месца: POP-UP Copenhagen, Ingerslevsgade 124, Капенгаген
Куратарка — Вера Залуцкая.
Адпраўны пункт выставы — архіў
VEHA, праект, распачаты Лесяй Пчолкай у 2017 годзе. Гэта адна з найважнейшых ініцыятыў па захаванні беларускай візуальнай спадчыны.
Праект «На вашых магілах мы справім вяселле. За межамі фотаархіва VEHA» па-новаму даследуе беларускую культуру і гісторыю.
Назва выставы «На вашых магілах мы справім вяселле» ўзята з верша Валерыя Маракова (1909-1937) «Тым, што пайшлі». Маракоў — беларускі паэт, расстраляны саветамі ў 1937 годзе разам з 22 іншымі беларускімі інтэлігентамі і грамадскімі дзеячамі.
Уяўленне аб вяселлі на магілах продкаў напоўнена надзеяй на пераемнасць жыцця, гісторыі і культуры беларусаў, а таксама верай у магчымасць падзяліцца шчасцем з роднымі, якія адышлі ў нябыт (абрады, прысвечаныя пакланенню духам продкаў і зносіны жывых з памерлымі прысутнічаюць у беларускім фальклоры да нашых дзён).
Мэта выставы, у тым ліку, — зрабіць беларускую гісторыю зразумелай і прывабнай для старонніх праз асвятленне агульначалавечых пытанняў і праблем, агульных для розных мясцовасцей і культур.
Удзел у выставе бяруць Кейт Нган Ва Ао, Разаліна Бусел, Уладзімір Грамовіч, Георг Ягуноў, Вольга Ганна Маркоўская, Леся Пчолка, Катажына Сянкевіч.
У межах выставы ў суботу, 8 чэрвеня ў 15.00, адбудзецца майстар-клас Разаліны Бусел па вырабе папяровых кветак.
Удзел у майстар-класе бясплатны, трэба запісацца па
спасылцы.
А ў нядзелю, 9 чэрвеня ў 13.00, будзе куратарская экскурсія з удзелам мастакоў.
Выстава працуе да 16 чэрвеня.
