Выстава «Выратаванае Евангелле» ў Гомелі
24.04.2026 - 08.05.2026
16:00 - 17:00
філіял Веткаўскага музея (пл. Леніна, 4а)
Бясплатнае
У пятніцу, 24 красавіка, у філіяле Веткаўскага музея адкрываецца выстава «Выратаванае Евангелле».
Сярод 59 населеных пунктаў Веткаўскага раёна, якія зніклі з мапы пасля Чарнобыльскай трагедыі ў 1986-1991 гг., значыцца і Косіцкая.
Вёска знакамітая тым, што яна адна з першых трох слабод, заснаваных яшчэ ў XVII ст. стараабраднікамі.
Дзеля захавання «старой веры» яны беглі за мяжу, на землі Вялікага княства Літоўскага, дзе і ўзнік магутны цэнтр стараабрадніцкай культуры — Ветка.
Сярод кніжных скарбаў, захаваных жыхарамі Косіцкай, — рукапіснае Евангелле XVI ст., упрыгожанае рознакаляровым арнаментам, з ужываннем тэмперных фарбаў і ліставога золата.
Манускрыпту, як мяркуецца, створанаму на землях ВКЛ, — паўтысячы гадоў. А праца майстра да гэтага часу цэлая, радуе вока і сэрца.
Папера ручной працы — французская, гэтага часу: са старонкі на старонку бяжыць вадзяны знак — дзік.
Кніга была напрастольным Евангеллем у косіцкім Троіца-Сергіевым храме.
У 1934 годзе ўсе кнігі з храма вынеслі — каб закапаць як перажытак мінулага. Уначы кнігу ўдалося выратаваць адной жанчыне, праўда, ужо без каштоўнага акладу. Кнігу схавалі і захавалі. У спадчыну яна дасталася пляменніку выратавальніцы, Васілю Вікулавічу Клімянкову.
У 1991 годзе знікла і сама Косіцкая слабада. Разважаючы пра лёс цудоўнага манускрыпта, яго гаспадар, ужо стары, у 2005 г. наведаў Веткаўскі музей і сказаў: «Сюды. Яна тут дома будзе».
І зараз гэтае выратаванае Евангелле можа ўбачыць кожны госць музея.
Уваход на адкрыццё вольны.
