Выстава «Заснавальнік» ў Гомелі

 

У пятніцу, 21 сакавіка, у філіяле Веткаўскага музея адкрываецца выстава «Заснавальнік».

Выстава прысвечана стагоддзю з дня нараджэння Фёдара Рыгоравіча Шклярава — майстра, калекцыянера, мастака, даследчыка, чалавека, які стварыў Веткаўскі музей.

Фёдар Шкляраў нарадзіўся ў сям’і стараабрадцаў, ён з дзяцінства быў акружаны стараабрадніцкімі іконамі, кнігамі, прадметамі побыту, але цікавасць да ўсяго гэтага ўзнікне ў яго значна пазней.

На сваім шляху якімі толькі навыкамі ён не авалодаў: цясляр, сталяр, мэбельшчык, тынкоўшчык, маляр, чаканшчык, фатограф, разьбяр па дрэве, афарміцель, мастак па тканінах на ткацкай фабрыцы.

Аднак галоўнай яго страсцю быў жывапіс. І больш за ўсё ён любіў маляваць пейзажы Веткі.

У 45 гадоў Фёдару Рыгоравічу паставілі памылковы дыягназ, паведаміўшы, што жыць яму засталося нядоўга. Гэты момант стаў кропкай пераасэнсавання — што ён паспеў, што пакіне пасля сябе?

Да гэтага ўзросту ён пабудаваў дом, пасадзіў каля яго сад і даў жыццё тром дзецям — здавалася б, стварыў свой мікракосм... Але раптам зразумеў «не паспеў даведацца: на чым сядзеў і па чым хадзіў» — не пазнаў ні каранёў сваіх, ні традыцый, ні культуры зямлі, на якой жыў. З гэтага моманту пачаўся шлях, які прывёў да стварэння Веткаўскага музея.

Ён стане «інтарэсантам»: будзе ездзіць па Веткаўшчыне ў пошуку стараабрадніцкіх ікон, кніг, прадметаў побыту. Дзякуючы гэтаму «шкляраўскаму пачатку» Веткаўскі музей стане ўнікальным цэнтрам вывучэння гісторыі рэгіёну.


Уваход на адкрыццё вольны.