17 лютага а 18 гадзіне Мемарыяльны музей-майстэрня З.І. Азгура запрашае на адкрыццё выставачнага праекта Тамары Шэлест “Пасаг”.
Праект “Пасаг” – містычнае інтымнае апавяданне пра час. Гэта вобраз адвечнай няспыннай перадачы захаванага – матэрыяльнага і нематэрыяльнага – з мінулага ў будучыню: птушкі ў дуплаватым галлі яблынь бароняць успаміны, зімовыя вуллі трымаюць цяпло мінулага, дом захоўвае ў сваёй памяці жыццё чалавека. Творца прымае агульную спадчыну і транслюе яе праз уласны мастацкі досвед.
Для праекта абрана складаная класічная тэхніка ляўкасу, якая набывае новае гучанне ў спалучэнні з тонкай аўтарскай графікай і незвычайным матэрыялам асновы. Носьбітамі ўспамінаў становяцца высушаныя часам рэшткі драўлянай аздобы, куфры ды старыя вуллі.
Выстава будзе працаваць з 17 лютага па 3 сакавіка 2017 года
