Нарэшце і нашы блогеры пачалі пісаць кнігі. Не толькі заходнія і расейскія букт’юберы рашаюцца на выхад уласных кніг, але і наш чалавек напісаў сапраўдны зомбі-хорар, які вельмі хоча паказаць свету і зрабіць гэта самым сучасным і даступным спосабам. Кніга, напісаная Уладзімірам Садоўскім, больш вядомы усім на прасторах інтэрнэту як аўтар паспяховага блогу yozas-gubka. Ён паспявае пісаць для ruh.by, kraj.by, tut.by, а таксама займаецца краязнаўствам.
З-пад яго пяра выйшаў першы зомбі-хорар на беларускай мове, які называецца «1813». Сюжэт і аснова кнігі вельмі хвалюючыя. Распавядае сам аўтар:
“Апошнім штуршком да напісання ўласнай навэлы стала кніга “Аўраам Лінкальн: паляўнічы на вампіраў”. Пасля прачытання гэтага рамана я падумаў, што магу і сам напісаць трэшачок нічым не горшы і пры гэтым не браць герояў з далёкай і невядомай Амерыкі, а выкарыстаць сваіх, мясцовых, балазе, гісторыя у нас багатая і ў ёй шмат адметных асоб і постацяў, якія б маглі змагацца з нечалавечай навалай не горш чым Лінкальн. Напрыклад, той жа Міхал Клеафас Агінскі. Месцам дзеяння навэлы “1813” я вырашыў абраць мястэчка Маладэчна (так гістарычна вымаўлялася назва нашага горада Маладзечна) і замак у яго ваколіцах, які калісьці належаў роду Агінскіх. Зараз ад таго замку засталося толькі замчышча, але на пачатку ХІХ стагоддзя ён яшчэ стаяў. Падставай для з’яўлення зомбі я вырашыў узяць падзеі вайны 1812 года, якая пракацілася праз нашы землі вогненнай хваляй. Дарэчы, як раз пад Маладэчна ў канцы 1812 года адбылася адна з апошніх бітваў той вайны. Мястэчка было разбурана, а ў наваколлях засталося шмат непахаваных жаўнераў. Па сюжэце Міхал Клеафас Агінскі прыязджае ў замак да свайго дзядзькі ўвесну 1813 года. Падчас адной з адліг забітыя жаўнеры “Вялікай арміі” Напалеона паўстаюць з адталай зямлі і пачынаюць тэрарызаваць акругу. Агінскі апынаецца ў акружэнні мерцвякоў і вымушаны змагацца з нечаканай навалай, што апанавала родны край.
Калі я задумваў “1813”, мне хацелася напісаць тое, што я сам бы з задавальненнем пачытаў, калі б не быў аўтарам. Мне вельмі падабаецца фантастыка, жахі пра зомбі і рэальная гісторыя. Усё гэта я вырашыў перамяшаць у сваім тэксце і цяпер хачу падзяліцца напісаным з шырокім колам чытачоў.
Апроч навэлы “1813”, у кнігу будуць уключаны некалькі маіх фантастычных апавяданняў, якія раней выходзілі ў літаратурных часопісах і зборніках”.
Гэтую кнігу трэба паказаць чытачу! Для гэтага Уладзімір, сумесна з праектам kniharnia.by запускае кампанію на краўндфандынгавай пляцоўцы ulej.by па збору сродкаў на выпуск электроннага выдання гэтай кнігі.
Чаму электроннай, а не папяровай, запытаецеся вы?
- Сёння амаль кожны чалавек заўсёды мае пры сабе лічбавую прыладу – мабільны тэлефон, планшэт ці рыдэр.
- Электронныя кнігі больш зручныя для распаўсюджвання, іх можна купіць па ўсім свеце літаральна за хвіліну.
- Электронная кніга не патрабуе вялікіх выдаткаў, асобнік выходзіць нашмат больш танным чым папяровы, да таго ж іх колькасць неабмежаваная.
Аднак працэс падрыхтоўкі да выдання электроннай кнігі нічым не адрозніваецца ад папяровай: рэдактура, карэктура, вёрстка, прысваенне ISBN. Усё гэта каштуе грошай. Грошы на гэтыя патрэбы збіраюцца з дапамогай краўдфандынга, бо сам тэкст кнігі “1813” напісаны і чакае свайго чытача.
Падрыхтоўкай электроннай кнігі, а таксама яе далейшым распаўсюджваннем у інтэрнэце будзе займацца партал kniharnia.by.
Цяпер вы разумееце, чаму варта падтрымаць гэты нязвыклы праект. Мы вельмі спадзяемся на вашу дапамогу. Для таго каб даць кнізе жыццё, дастаткова перайсці па спасылцы і замовіць кнігу ўжо цяпер.
