Алесь Тодараў высвятляе на budzma.org, чаму зазвычай паспяховыя людзі не занураныя ў мінулае, але рухаюцца наперад і будуць сваю будучыню, і прыводзіць фразы, якія не даюць нам гэтага рабіць і ў выніку руйнуюць нашае жыццё.
Можна і варта азірацца назад толькі для таго, каб ацаніць, як далёка вы зайшлі наперад. Дамагацца прагрэсу — значыць без прыпынку ісці наперад.
Шмат хто часцяком кажа: «Спусціцеся з нябёсаў, здыміце ружовыя акуляры, жыццё не такое, якім вы сабе яго ўяўляеце!». Спяшаюся вас пераканаць — жыццё якраз такое, якім вы яго сабе прыдумалі!
Навакольныя не вераць у вас? Ну, і няхай! Галоўнае — паверце ў сябе самі. Можаце марыць столькі, колькі заўгодна, бо думкі матэрыяльныя. Кожную мару, нават самую дзіўную, можна ператварыць у мэту і дасягнуць яе.
Найперш ператварыце сваю мару ў мэту. Для гэтага трэба вырашыць, як менавіта вы будзеце яе дасягаць. Ніколі не адкладайце сваю мару на «заўтра», на «потым», «у мяне яшчэ шмат часу, гэта пачакае». Не, не пачакае!
Давайце разгледзім 5 фраз, дзякуючы якім мы часта перастаем рухацца наперад, адкладаем нашы мары на потым, і руйнуем сваё жыццё.
«У мяне няма часу»
Часцей за ўсё людзі, якія так кажуць, насамрэч не хочуць змяніць сваё жыццё. Яны выкарыстоўваюць гэтае выслоўе, каб не адчуваць віну, калі не могуць знайсці баланс у жыцці. Калі вы сапраўды чагосьці хочаце, і гэта для вас важна, вы зможаце знайсці час. На што заўгодна!
«Я не магу сабе гэта дазволіць»
Слабенькія галасы ў нашых галовах прымушаюць прывыкаць да гэтай фразы як да аргументу. І яе сутнасць заключаецца ў тым, каб не марнаваць грошы на рэчы, якія насамрэч для нас важныя. Калі гэтыя галасы кажуць аб тым, што вы «не можаце сабе гэта дазволіць», перш за ўсё, вам трэба разабрацца са сваімі патрэбамі і вызначыць, на што вы сапраўды марнуеце грошы.
«Я занадта стары»
Сюзана Колінз напісала кнігу «Галодныя гульні», калі ёй было 46 гадоў. Тамаі Ватанабе паднялася на Эверэст у другі раз ва ўзросце 73 гадоў, праз 10 гадоў пасля папярэдняга рэкорду. Таму насамрэч не мае ніякага значэння, колькі вам гадоў. Усё, што перашкаджае дасягненню мэты ці ажыццяўленню мары — гэта той слабенькі голас у галаве, які спыняе вас ад пазітыўных змен.
«У мяне няма такіх жа магчымасцяў, як у іншых людзей»
Часам акалічнасці складаюцца так, а няйначай, і ў гэтым няма нашай віны. Але наш абавязак палягае ў тым, каб паспрабаваць іх змяніць. Калі мы прызнаем той факт, што ніхто, акрамя нас саміх, не выцягне нас з ямы, мы зможам змяніць сваё жыццё.
«Жыццё — гэта не казка. Будзь рэалістам!»
Калі мы разглядаем наша існаванне як нешта, што трэба перацярпець, кожнае выпрабаванне толькі ўзмацняе негатыў, а па выніку мы адчуваем сябе яшчэ больш няшчаснымі. Аднак, калі мы ўспрымаем жыццё, як падарожжа, кожны выклік становіцца магчымасцю навучыцца нечаму новаму, расці і мяняцца. Калі вы будзеце атрымліваць задавальненне ад жыцця, то ў ім будуць адбывацца збольшага прыемныя альбо хаця б цікавыя і павучальныя рэчы.
Чаму нашыя мары не спраўджваюцца?
Мара не ператварылася ў мэту
Дакладна і зразумела сфармулюйце мэту, абазначце тэрміны выканання. Не варта ператвараць у мэту тое, што не залежыць ад вас, — гэта сэканоміць вам час і нервы.
Няма ўяўлення аб выніку — няма выніку
На жаль, часта мы цмяна ці ўвогуле не уяўляем вынік нашых жаданняў. Візуалізацыя ў гэтым працэсе іграе вельмі важную ролю.
Шлях рэалізацыі не намечаны
Гэта адна з галоўных прычын, чаму мэта можа быць не дасягнута. Важна не думаць на дадзеным этапе аб магчымых рызыках і максімальна абстрагавацца ад страху перад няўдачамі.
Адсутнічае матывацыя і падтрымка
Калі мэта патрабуе дапамогі іншых людзей, шукайце аднадумцаў. Калі вы зможаце дасягнуць яе самастойна, атачыце сябе людзьмі, якія ў вас вераць.
Не забывайце, што мары істотна павялічваюць прадуктыўнасць мозгу і дапамагаюць знайсці спосаб рашэння шматлікіх задач.
Калі вы дакладна разумееце, што менавіта вам трэба рабіць, то адразу ж пачынайце! Рабіце ўсё, што ў вашых сілах, і нават больш — старанная праца заўсёды прыводзіць да добрага выніку. Заўсёды!
Алесь Тодараў, budzma.org
