8-ы кінафестываль «Паўночнае ззянне» прэзентаваў спецыяльную праграму «UKRAINE MON AMOUR», створаную на знак салідарнасці з Украінай. У яе ўвайшлі тры украінскія фiльмы, якія былі зробленыя разам з Нардычнымі і Балтыйскімі краінамі. Спецыяльную ўкраінска-балтыйска-нардычную праграму і іншыя фільмы кінафестывалю сёлета можна будзе паглядзець з 20 па 30 лістапада бясплатна, а падтрымаць «Ззянне» данатамі можна ўжо цяпер па спасылцы.
«Ukraine mon amour» складаецца з трох дакументальных фільмаў, кожны з якіх нясе ўнікальны погляд на ваенныя падзеі ва Украіне і адчуванне дому на іх фоне, што пераклікаецца са слоганам «Ззяння-2022»: feels like home. Праграма прысвячаецца смелай барацьбе Украіны за свабоду i супраць расейскай агрэсіі, а таксама з’яўляецца шчырым жэстам падтрымкі «Паўночнага ззяння» ўкраінскіх калег і каляжанак, сяброў і сябровак у кіно.
20/11/22
«Гэты дождж ніколі не скончыцца», 2020, Украіна, Латвія, Германія, Катар
Чорна-белы фільм, які створаны ўкраінскай рэжысёркай Алінай Горлавай. Гэта візуальна вытанчанае і дасканала змантаванае дакументальнае кіно з уражальным саўнд-дызайнам пра ўцёкі ад вайны. «Гэты дождж ніколі не скончыцца» дапамагае паглядзець праз прыватную гісторыю адной сям’і на глабальны бесперапынны цыкл вайны і міру. Па словах Аліны Горлавай, яны з камандай фільма імкнуліся паказаць дуальнасць свету, яго кантрасты. Калі існуюць гуманітарныя місіі і ў той жа час такія мілітарызаваныя падзеі, як ваенны парад.
Фільм атрымаў мноства ўзнагарод за сваю фестывальную гісторыю. Хоць і першапачаткова рэжысёрка планавала зняць кароткі метр пра Данбас. Яна зусім не ўяўляла, што пазнаёміцца з героем, чыя гісторыя завядзе Аліну ў Ірак і Германію, падштурхне здымаць больш за 30 гадзін перавоз памерлага бацькі галоўнага героя ў Сірыю, а здымкі ўсяго фільма зоймуць чатыры гады.
Цяпер Аліна Горлава працягвае знаходзіцца ў Кіеве і там здымае вайну. Даведацца больш пра фільм можна тут.
Трэйлер:
23/11/22
«Звонку», 2022, Украіна, Данія, Нідэрланды
«Звонку» — поўнаметражны дакументальны дэбют украінскай рэжысёркі Вольгі Журбы, які яна стварала 7 гадоў. Фільм-падарожжа і фільм-партрэт хлопчыка Ромы, які ідзе па жыцці як па гарачых вуглях... беднасці, рэвалюцыі і бяздомнасці. Дзякуючы тэлефонным размовам паміж хлопчыкам і рэжысёркай, відэазапісам з камер назірання і здымкам дрэйфу Ромы па жыцці, складаецца гісторыя пра бязроднага маладога чалавека, кінутага бацькамі на апеку жыцця, а потым і сістэмай, пра пошук свайго месца ў свеце і свайго дома.
Рэжысёрка звяртае ўвагу на самае страшнае, што адбываецца з такімі дзецьмі, — на абыякавасць грамадства. «Мы заўважаем гэтых дзяцей толькі тады, калі яны нам нашкодзяць, пасля чаго мы іх адпраўляем за краты», — разважае Вольга Журба і падымае гэтае пытанне ў сваім фільме.
«Дом з аскепкаў», 2022, Данія, Швецыя, Фінляндыя, Украіна
Дакументальны фільм «Дом з аскепкаў» прысвечаны гісторыі прытулку для дзяцей ва ўсходнім горадзе Украіны — Лісічанску, куды змяшчаюць дзяцей з небяспечных сем’яў на 9 месяцаў. Пасля чаго ім знаходзяць новы дом, ці яны вяртаюцца ў стары, ці ж перамяшчаюцца ў дзіцячы дом.
Дацкі рэжысёр Сымон Лерэнг Вільмонт у «Доме з аскепкаў» працягвае тэму свайго знакамітага першага фільма «Сабачы брэх удалечыні», прапаноўваючы ўнікальны погляд на тое, як доўгатэрміновыя наступствы вайны адбіваюцца на грамадстве, асабліва на самых уразлівых яго частках — на дзецях. Гэта пранізлівы і глыбока інтымны партрэт прамежкавай станцыі і пры гэтым кранальнае антываеннае выказванне пра тое, як сацыяльная несправядлівасць фармуе вывучаную бездапаможнасць з самага ранняга ўзросту.
Уся праграма «Ukraine mon amour» будзе даступная бясплатна ў фармаце online па папярэдняй рэгістрацыі, якая пачне працаваць у пачатку лістапада. Глядзець фільмы «Ззяння» можна будзе з 20 па 30 лістапада, яны будуць даступныя 24 гадзіны згодна з раскладам, які зусім скора будзе даступны на афіцыйным сайце «Паўночнага ззяння». Ужо цяпер вы можаце падтрымаць фестываль данатам.
