Пасля рэканструкцыі і частковай рэстаўрацыі палацава-паркавага комплексу ў в.Свяцк адкрылі першую чаргу аб’екта. Дзякуючы рэканструкцыі цалкам адноўлена знешняе аблічча, праведзеныя ўнутраныя працы ў флігелях і галерэях палаца, паведамляе БЕЛТА.
У склад палацава-паркавага комплексу XVIII стагоддзя ўвайшлі гатэль з камфартабельнымі нумарамі для размяшчэння 58 чалавек, SPA-цэнтр, рэстарацыя, бровар, залы для правядзення выставаў, канферэнцый і прэзентацый. Першых гасцёў комплекс прыме напрыканцы траўня.
Акрамя таго, раней былі ачышчаныя сажалкі ад глею, праведзена санітарная прыборка вакол вадаёмаў, завершаныя працы па рэканструкцыі водапрапускной сістэмы, шлюза, добраўпарадкаванні тэрыторыі навокал сажалак.
Палац быў пабудаваны паводле праекта італійскага архітэктара Джузепе Сака з Вероны на замову прадстаўнікоў магнацкага роду Валовічаў. Ён быў узведзены ў 1779 годзе і меў рысы ранняга класіцызму. Канчаткова палацавы ансамбль склаўся ў пачатку XIX стагоддзя, калі былі пабудаваныя бакавыя флігелі, якія злучаліся з палацам паўцыркульнымі галерэямі. Свяцкі палацава-паркавы комплекс — матэрыяльная нерухомая гісторыка-культурная каштоўнасць Рэспублікі Беларусь 2-й катэгорыі.
Фота Леаніда Шчаглова
