У Швецыі знайшлі палявы дзённік караля Карла XII з нататкамі пра Мінск, Галоўчын, Магілеў і пераход гетмана казацкай Украіны Івана Мазепы на бок шведаў. Пра знаходку паведаміў гісторык Андрэй Катлярчук на сваёй старонцы ў Фэйсбук.
268-старонкавая кніга з нататкамі і малюнкамі, якія Карл XII ўласнаручна рабіў у паходах, была знойдзена ў бібліятэцы Гётэборгскага ўніверсітэта, піша «Göteborgs-Posten».
— Ніхто не ведаў, што яна існуе, — кажа даследчыца Antoaneta Granberg, якая знайшла кнігу, калі шукала славянскія рукапісы ў вялікім зборы Hvitfeldtska samlingen які дагэтуль не каталагізаваны.
Нататкі ахопліваюць перыяд ад лета 1707 года да восені 1717 года. Акрамя самога караля, таксама рабілі запісы ягоныя памочнікі Карл Піпер і Самуэль Окерхельм.
Некалькі частак напісаны ва Украіне перадусім на Палтаўшчыне. Гранберг прызнае што ў Швецыі захоўваюцца іншыя, раней вядомыя, копіі дзённіка але яны не маюць ілюстрацый арыгінала. Дзённік хутка будзе дыгіталізаваны і даступны на старонцы бібліятэцы Гётэборгскага ўніверсітэта.
