Аўгустоўскі канал 31 мая адкрые летні турыстычны сезон святам народнай творчасці. Пра гэта карэспандэнту БЕЛТА паведаміла начальнік аддзела ідэалагічнай работы, культуры і па справах моладзі Гродзенскага райвыканкама Наталля Рамановіч.

Адкрытае рэгіянальнае свята народнай творчасці “Аўгустоўскі канал запрашае сяброў” пройдзе на шлюзе Дамброўка і па традыцыі адзначыць пачатак рэкрэацыйнага сезону, які ў гэтым годзе крыху позніцца з-за сырога і прахалоднага надвор’я. Для гарадзенцаў і турыстаў арганізатары падрыхтавалі разнастайную праграму, яна пачнецца папаўдні і разлічана на ўвесь светлавы дзень. Гасцей чакаюць канцэрты, гульні для дарослых і дзяцей, конкурсы, тэатралізаваныя пастаноўкі.

Па ўжо існуючай традыцыі старт святу дасць касцюміраванае тэатралізаванае шэсце ўстаноў культуры Гродзенскага раёна, якое завершыцца сімвалічным спускам на ваду маляўнічага карабля, вырабленага з падручных сродкаў.

У праграме фестывалю таксама выстава-кірмаш вырабаў народных умельцаў. Майстры аддзела этнаграфіі, фальклору і рамёстваў Гродзенскага раённага культурна-інфармацыйнага цэнтра правядуць майстар-класы па дэкаратыўна-прыкладной творчасці. Для гасцей адбудзецца таксама выстава-кірмаш кулінарных вырабаў, пройдуць канцэрты вядомых ансамбляў і эстрадных выканаўцаў вобласці. Будзе арганізавана дзіцячая гульнявая пляцоўка, выязны гандаль.

На шлюзе адкрыюцца звыш 20 гасцінных падворкаў розных устаноў культуры Гродзенскага раёна. Падворкі будуць змагацца ў аглядзе-конкурсе на самую арыгінальную ідэю і яе ўвасабленне.

Завершыцца свята танцавальна-забаўляльнай праграмай з удзелам творчых калектываў клубных устаноў.

Адкрытпе рэгіянальнае свята народнай творчасці “Аўгустоўскі канал запрашае сяброў” праводзіцца штогод з мэтай развіцця і ўмацаванне культурных сувязяў, папулярызацыя народнай творчасці і традыцый, адпачынку на Аўгустоўскім канале. У жніўні рэкрэацыйны парк прымае яшчэ адзін, ужо міжнароднага значэння фестываль “Аўгустоўскі канал у культуры трох народаў”. У летні перыяд на беларускай частцы канала праходзяць шматлікія сплавы, спартыўна-турыстычныя і іншыя мерапрыемствы. З 2 мая тут пачаў працаваць сезонны рачны памежны пункт “Лясная – Рудаўка”, які дазваляе перасякаць беларуска-польскую мяжу арганізаваным групам на водных сродках перамяшчэння па папярэдніх заяўках. У цяперашні час вырашаюцца пытанні арганізацыі на папулярных участках канала сезонных пунктаў пракату, месцаў грамадскага харчавання і іншых аб’ектаў турыстычнай інфраструктуры. У стадыі рэалізацыі на Аўгустоўскім канале знаходзяцца некалькі больш буйных праектаў па стварэнні турысцка-рэкрэацыйных комплексаў і гасцініц.

БелТА