У Беларусі з’явіцца свой аналаг Booking.com і Airbnb. Пра гэта распавёў Барыс Якавіта, заснавальнік праекта «БелКрай», каманда якога працуе над сэрвісам браніравання для падарожнікаў, піша Office Life.

Запусціць пляцоўку абяцаюць да пачатку ліпеня. Уладальнікі жылля змогуць наладжваць каляндар занятасці і цэны, а турысты атрымаюць магчымасць не толькі шукаць, але браніраваць і аплачваць анлайн.

«Наш праект "БелКрай" ужо дастаткова добра вядомы ў Беларусі сярод аграсядзібаў і гідаў. У нас два асноўных напрамкі — сядзібы і экскурсіі. Для апошніх анлайн-браніраванне ўжо рэалізавана, і з гэтым сэрвісам мы нават выйшлі за межы краіны каля года таму» — заяўляе Барыс Якавіта.

А вось раздзел з жыллём пакуль працуе ў выглядзе звычайнага інфармацыйнага каталога. Па словах Барыса, яго як стварылі 6 гадоў таму, у такім выглядзе ён да гэтага часу і існаваў, хоць планы ператварыць яго ў паўнавартасны сэрвіс браніравання з’явіліся даўно.

Зараз жа, калі Booking.com і Airbnb сышлі з беларускага рынку, аўтары праекта зразумелі, што з’явілася выдатная магчымасць частку гэтай нішы забраць сабе. Пракансультаваліся з юрыстамі, знайшлі спосаб ўвасобіць задумку ў жыццё ў адпаведнасці з заканадаўствам і заняліся распрацоўкай.

У пачатку сакавіка на фоне ўзброенага канфлікту ва Украіне сэрвісы браніравання жылля і гатэляў Booking.com і Airbnb закрылі магчымасць здымаць кватэры і гасцінічныя нумары ў Беларусі і Расіі.