«Пропаведзі» архіепіскапа Арцемія — сапраўды духаўздымнае чытво. Люблю іх перачытваць, каб канчаткова не ўпасці ў адчай і беспрасветны смутак», — піша Міхась Скобла на сваёй старонцы ў Фэйсбук.
«Асабліва пасля жніўня 2020 года. Асабліва пасля асуджэння архіепіскапам распачатага ў краіне гвалту і беззаконня і крывадушнага адхілення яго ад епіскапскай кафедры (нібыта па стане здароўя)... Неяк я запытаўся ў Арцемія, ці прынцыповым было для яго выдаць «Пропаведзі» менавіта па-беларуску. І вось што ён адказаў: «Безумоўна. Мы цяпер патрабуем ад святароў вядзення богаслужэнняў на беларускай мове. А найперш святарам трэба пераходзіць на мову ў пропаведзях, каб народ, слухаючы іх на роднай мове, узбагачаўся культурай свайго краю. Мы ж ведаем, калі прыходзілі захопнікі на нашу зямлю, яны найперш знішчалі храмы і мову. Без веры і мовы чалавек ператвараецца ў жывёліну, якою лёгка кіраваць. А прыкметы свабоднай асобы — вера і свая нацыянальная культура. Таму вельмі важна, каб гучалі пропаведзі па-беларуску».
Чытайце яшчэ: Пайшоў з жыцця былы архіепіскап Гродзенскай і Ваўкавыскай епархіі БПЦ Арцемій
