Горад жыве ў чаканні дня нараджэння, які ўрачыста і шырока адзначыць 6-7 чэрвеня.
Юбілею будуць прысвечаны чарговыя “Браслаўскія зарніцы”. Гэта свята традыцыйнай культуры, які пройдзе 48-ы раз, але ўпершыню стане міжнародным.
На ўрачыстасці ў Браслаў прыедуць афіцыйныя дэлегацыі, вакальныя і танцавальныя калектывы не толькі з Беларусі, але і з Літвы, Латвіі, Эстоніі, Азербайджана, Індыі, Расіі, Польшчы.
Старт свята будзе дадзены ў суботу, 6 чэрвеня, на плошчы каля касцёла Святой Панны Марыі. Яго эстафету прыме “Браслаўская харавая асамблея” – абласны агляд-конкурс, які пройдзе чацвёрты раз, дзе пакажуць майстэрства больш за 20 харавых калектываў Віцебшчыны. Асамблея, прымеркаваная да 950-годдзя горада, знамянальная тым, што ў зводным хоры выступіць небывалая колькасць удзельнікаў – 800 спевакоў! Пра гэта распавяла Алена Котава, намеснік начальніка аддзела ідэалагічнай працы, культуры і па справах моладзі.
Таксама ўпершыню ў рамках харавой асамблеі пройдзе турнір беларускіх бытавых танцаў. Потым эпіцэнтр свята перамесціцца на гарадзішча “Замкавая гара”. Там будзе разбіты сапраўдны сярэднявечны горад. На свята абяцаюць прыехаць каля дзесяці рыцарскіх клубаў з Беларусі і Прыбалтыкі. На Замкавай гары пройдуць камандныя баі, выступленні музычных гуртоў, здабыча агню старажытным спосабам, акрабатычнае шоў, шэсце на хадулях, узнагароджанне удзельнікаў, шэсце з паходнямі, салют. Пераможца бітваў атрымае меч Брачыслава.
А 7 чэрвеня асноўныя святочныя мерапрыемствы з гала-канцэртам, прэзентацыяй падворкаў і народнымі гуляннямі пройдуць у лесапарку Леснічоўка.
Вера Гнілазуб, sb.by
