Цяпер беларусы могуць самі бясплатна вывучыць мову краіны-суседкі. Другі год запар у інтэрнэце працуе платформа polskijazyk.pl, якая дазваляе самастойна вучыцца і адначасова бліжэй знаёміцца з гісторыяй і культурай Польшчы. Гэтай восенню ўнікальная платформа істотна абнавілася.
Новай магчымасцю, якая з’явілася зараз, стала мабільная версія. Цяпер вывучаць мову зручна на любой прыладзе, незалежна ад памеру экрана. Неўзабаве абновяцца і самі курсы – польскую можна будзе вывучаць на ўзроўні B2 (упэўнены карыстальнік) – максімальна магчымым пры самастойным вывучэнні.
Зручнасць платформы ацанілі ўжо карыстальнікі з Беларусі, Украіны і Расіі. За першы год працы тут зарэгістравалася больш за 27 тыс. чалавек. Каля 60% карыстальнікаў вяртаюцца і працягваюць вучыцца. А ўкраінскія карыстальнікі нават дамагліся таго, каб распрацоўшчыкі пераклалі платформу на іх родную мову!
Над метадычнай часткай працавалі вядучыя спецыялісты-філолагі адной з варшаўскіх моўных школ з вопытам навучання мове замежнікаў. Карыстальнікі, пачынаючы з асноў – ўзроўню А1, могуць дайсці да B1 і B2, пры якіх могуць здаваць у Польшчы афіцыйны моўнай экзамен і атрымаць сертыфікат.
Кожны з узроўняў складаецца з тэматычных урокаў, у якіх выкарыстоўваецца 12 розных відаў інтэрактыўных заданняў і практыкаванняў. Карыстальнікі могуць праслухаць больш за 1000 аўдыёфайлаў, запісаных прафесійнымі дыктарамі. Граматычныя табліцы можна захоўваць сабе на камп’ютар, раздрукоўваць і выкарыстоўваць асобна ад платформы.
На думку аўтараў праекта, фонду “Акно на Усход” з Беластока, моўная платформа дапаможа жыхарам суседніх з Польшчай краін, у тым ліку жыхарам Беларусі, не толькі эфектыўна асвоіць мову краіны-суседкі, але і пазнаёміцца з польскай культурай. Таксама яна будзе карысная маладым людзям, якія збіраюцца вучыцца або працаваць у Польшчы. Выкарыстоўваць яе ў якасці дадатковага інструмента могуць і моўныя школы, рэпетытары, выкладчыкі – матэрыялы сайта можна капіяваць сабе на прылады.
Платформа распрацавана фондам “Акно на Усход” у рамках конкурсу МЗС Польшчы “Супрацоўніцтва ў галіне публічнай дыпламатыі-2016”.
Аб праекце
Платформа polskijazyk.pl – комплексны бясплатны інструмент для вывучэння польскай мовы, створаны для маладых людзей з Беларусі, Украіны, Расіі і ўсіх, для каго адной з асноўных моваў з’яўляецца руская.
Мэта платформы – папулярызаваць польскую мову і культуру. Платформа дае магчымасць бясплатна вывучаць польскую мову анлайн на узроўнях ад А1 (пачатковец) да B2 (вышэй сярэдняга). Курсы распрацавала адна з вядучых польскіх фірмаў з шматгадовым вопытам навучання замежнікаў польскай мове. Былі ўзятыя пад увагу патрабаванні, якія ставяцца пры падрыхтоўцы замежнікаў для атрымання моўнага сертыфіката аб веданні польскай мовы.
Платформа polskijazyk.pl – першы і ўнікальны ў сваім родзе інструмент, які дае магчымасць бясплатна і дыстанцыйна вывучаць польскую. Раней падобных інструментаў не існавала.
