Бюсты нацыянальным героям Беларусі былі адлітыя ва Украіне паводле праекта скульптара Геніка Лойкі, піша Вадзім Васільеў на сваёй стронцы ў Facebook.
26 красавіка каля будынку Святога Кірылы Тураўскага на 401 Атлантык-Авеню ў Брукліне адбылася ўрачыстая імпрэза — адкрыццё бюстаў вялікім беларускім дзеячам — нацыянальнаму герою Беларусі, ЗША і Польшчы Тадэвушу Касцюшку і нацыянальнаму герою Беларусі — Кастусю Каліноўскаму.
Народжаны на тэрыторыі сучаснай Беларусі Андрэй Тадэвуш Банавентура Касцюшка браў актыўны ўдзел у вайне за незалежнасць ЗША (1775–1783 гады). Па вяртанні на Радзіму ўзначаліў вызвольнае паўстанне народаў Рэчы Паспалітай супраць акупацыі іх родных зямель імперскай Расіяй (1794 год).
Кастусь Каліноўскі ўзначальваў вызвольнае паўстанне супраць імперскай Расіі 1863–1864 гадоў.
Нашы нацыянальныя героі змагаліся за незалежнасць Беларусі, Амерыкі, а таксама Польшчы і Літвы, з якімі Беларусь мела супольную гісторыю.