Гурт сярэднявечнай музыкі Testamentum Terrae учора выступіў з калядным канцэртам перад дзецьмі мінскага дому-інтэрнату №8. Ініцыятыва правядзення імпрэзы належала аднаму з выхавацеляў інтэрнату Алесю Кушнеру. Імпрэза ладзілася пры падтрымцы кампаніі “Будзьма!”.

“Можа з той прычыны, што дзеці ніколі не чулі падобнай музыкі, яны засталіся ўражанымі ад выступу Testamentum Terrae. Яны пелі, танчылі, пасля канцэрту прасілі паспрабаваць самім сыграць на інструментах, якія таксама бачылі ўпершыню”, – адзначыў Алесь Кушнер.

Па яго словах, не зважаючы на складаныя сямейныя абставіны, у якіх апынуліся гэтыя дзеці, па сваім развіцці яны не саступаюць сваім равеснікам. Шмат хто з іх ужо ў дзяцінстве выказвае схільнасць да музыкі, мастацтва, літаратуры. “Я ўпэўнены, што гэты калядны канцэрт зрабіў вялікі ўнёсак у іх творчае развіццё”, – паведаміў Алесь Кушнер.

“TESTAMENTUM TERRAE” (з лацінскай мовы “Запавет зямлі”) – беларускі гурт сярэднявечнай музыкі, створаны ў 2003 г., першапачаткова меў назву “TESTAMENT”, стваральнік і кіраўнік – Юрась Панкевіч. Гурт удзельнічае ў фестывалях сярэднявечнай культуры (“Лідскі Замак”, “Русборг”, “Рубеж”, “Магутны Божа”, “Грунвальд”, “Старадаўні Львоў” і інш.), фестывалях сярэднявечнай музыкі і музычных конкурсах (“Легенды восені”, конкурс выканаўцаў сярэднявечнай музыкі “У гонар каралевы Боны”), а таксама арганізоўвае ўласныя танцавальныя вечарыны.
Гурт “TESTAMENTUM TERRAE” выкарыстоўвае копіі інструментаў XV–XVІІІ стст.: беларускія дуды, лютню, шалмеі, жалейкі, скрыпку, бубны, барабаны і іншыя.

Фота Алеся Кушнера.

Тэгі: Мінск