У Беларусі назіраецца рост захворвання на вострыя рэспіраторныя і каронавірусную інфекцыі. На сённяшні момант большасць пацыентаў хварэюць у хатніх умовах. У сувязі з чым, як і меркавалася, узрасла нагрузка на амбулаторна-паліклінічную і педыятрычную службы.
Мінздароўя абвясціла агульную мабілізацыю
Мінздароўя інфармуе: у кожнай установе аховы здароўя распрацаваны планы па арганізацыі працы ў залежнасці ад узроўню росту захворвання і зваротнасці пацыентаў.
Разумеючы, што нагрузка на медработнікаў будзе высокая, Міністэрства аховы здароўя загадзя правяло навучанне лекараў розных спецыяльнасцяў ва ўсіх абласцях краіны, была прадумана лагістыка працы кантактных брыгад. Як і ва ўсіх краінах свету, прыцягваюцца да працы студэнты медуніверсітэтаў, навучэнцы медкаледжаў у ролі валанцёраў і работнікаў кол-цэнтраў.
З 1 лютага прыпыненыя (да асобага распараджэння) адукацыйныя мерапрыемствы – курсы павышэння кваліфікацыі, семінары, навукова-практычныя канферэнцыі, якія праводзяцца ў мэтах удасканалення прафесійных ведаў медработнікаў у Рэспубліцы Беларусь.
Амікрон пасля прышчэпкі пераносіцца лягчэй
Як адзначаюць беларускія медыкі, грамадзяне, якія паспелі вакцынавацца або прайсці рэвакцынацыю, хварэюць цяперашнім штамам каронавіруса (амікронам) на працягу некалькіх дзён, пры гэтым ён праходзіць як вострая рэспіраторная інфекцыя, а не пнеўманія.
Асноўнымі сімптомамі амікрон-штама з’яўляюцца: боль у горле, кашаль, насмарк, у некаторых адзначаецца павышэнне тэмпературы, ламата і слабасць.
Беларуская сістэма аховы здароўя падрыхтавалася да прыходу новага штаму – правераныя ўсе кіслародныя сістэмы, павялічаныя запасы сродкаў індывідуальнай абароны і лекавых сродкаў.
Асноўныя спосабы зберагчы сябе ад захворвання – гэта вакцынацыя, а таксама дыстанцыяванне, выкарыстанне сродкаў індывідуальнай абароны органаў дыхання, гігіена рук.
